Pasiente sira bele vota iha kuarentena no izolamentu
DILI, 05 fevereiru 2022 (TATOLI) – Sekretariadu Tékniku Administrasaun Eleitorál (STAE), sei fasilita pasiente infetadu Covid-19 ne’ebé baixa iha sentru kuarentena no izolamentu hodi ezerse direitu votu iha loron eleisaun prezidensiál.
Diretór Jerál STAE, Acilino Manuel Branco, esplika, lei fó dalan STAE hodi halo koordenasaun ho médiku sira organiza votasaun ba iha pasiente ka eleitór infetadu Covid-19 ne’ebé baixa hela iha sentru kuarentena no izolamentu.
“Embora kazu Covid-19 kontinua tún maibé ikus-ikus ne’e ita rona fali númeru signifikante pozitivu fali maibé lei fó dalan karik oinsá bele to’o iha loron eleisaun mak eleitór barak hala’o hela tratamentu iha sentru kuarentena no izolamentu sei halo mós votasaun iha-ne’ebá,’’ Diretór Jerál STAE, Acilino Branco, informa ba Agéncia Tatoli iha Caicoli, sábadu ne’e.
Dekretu Governu númeru 12/2022, 14 janeiru, exersísiu direitu votu iha eleisaun prezidensiál 2022 ba eleitór internadu iha sentru izolamentu profilátiku ka terapéutiku obrigatóriu.
STAE mós sei fasilita votasaun ambulante ba pasiente sira ho kondisaun moras ka eleitór ho idade 17 ba leten ne’ebé internamentu ka baixa hela iha ospitál nasionál, referál, munisípiu sira ho estabelesimentu prizionál.
Votasaun ambulante ne’e ho baze dekretu Governu númeru 10/2022, 14 janeiru, alterasaun dahuluk hosi dekretu Governu númeru 12/2017, 27 fevereiru, ne’ebé regula ezersísiu direitu votu iha estabelesimentu ospitalár no prizaun.
Nia mekanizmu mak antes loron 10 eleisaun entaun responsável ospitál sira sei haruka lista ba STAE kona-ba pasiente hira mak baixa hela ho membru família ida ho tinan 17 ba leten ne’ebé akonpaña atu ezerse votu. Hafoin ne’e STAE halo kalkulasaun nune’e prepara lista bainhira iha loron eleisaun sei mobiliza urna hosi sentru votasaun ne’ebé besik hodi fasilita votasaun.
Diretór Jerál STAE, hateten aplikasaun kondisaun seluk ba pasiente iha situasaun ida-ne’ebé sei integra iha sentru votasaun paralelu nia tratamentu bainhira iha sidadaun ruma mai hosi munisípiu seluk.
Maibé nia halo hela tratamentu iha Dili, labele fila-fali ba nia munisípiu orijen mak tenke aprezenta atestadu médiku hodi justifika liuhosi responsável saúde hafoin enkamiña ba Ministériu Saúde hodi haruka ba STAE fasilita iha tempu votasaun.
“Tempu badak STAE sei haruka korrespondénsia ba iha Ministériu Saúde atubele informa iha ospitál sira atu nune’e identifika pasiente sira’’Nia hateten.
Jornalista : Nelson de Sousa
Editór : Evaristo Soares Martins
