DILI, 07 fevereiru 2022 (TATOLI)— Ministru Justisa, Manuel Cárceres, informa iha fulan-dezembru 2021, indefere tan kandidatu partidu polítiku Os Verdes de Timor tanba seidauk kumpre notifikasaun hosi Tribunál Rekursu (TR) kona-ba rekizitu inskrisaun.
“Partidu ne’ebe que ensiste iha vontade tebe-tebes atu rejistu sai partidu maka Os Verdes de Timor de’it. Maibé iha fulan dezembru, ha’u indefere dala ida tan tanba seidauk kumpre rekezitu liuliu dokumentu kona-ba apoiante ne’ebé sira lori mai la to’o 20.000. Nune’e ha’u husu sira hadia tiha mak lori fali mai,” Ministru Manuel Cárceres, hateten ba jornalista sira hafoin abertura formasaun kursu notariadu ba ema na’in 40 iha salaun Ministériu Justisa Caicoli, segunda ne’e.
Lei partidu polítiku, lei númeru 2/2016, 3 fevereiru, primeira alterasaun ba lei númeru 3/2004 14 abríl, Ministériu Justisa, liuhosi Diresaun Jerál Servisu Rejistu Notariadu ninia kna’ar mak atu halo autentikasaun ba dokumentu pedidu inskrisaun partidu foun sira.
Ezemplu, partidu ida iha apoiante 20.000, mai ho kartaun eleitorál parte Notáriu autentika hodi tau karimbu bainhira identifika kartaun ruma iha duplikasaun no partidu sira ninia apoiante iha kada munisípiu la to’o 1.000, ida-ne’e sei rekomenda de’it ba Tribunál Rekursu (TR) mak sei deside.
“Partidu ida atu prense rekezitu tuir lei partidu polítiku artigu 13 katak apoiante tenke maihosi munisípiu ida 1.000, se munisípiu ida la to’o 1.000 ne’e konsidera la prenxe rekezitu, no tenke aprezenta ho rekezitu komprovativu seluk hanesan sertidaun moris, sertidaun kasamentu, pasaporte ou Bileti Identidade.entre buat hirak ne’e ida,” Governante ne’eakresenta.
Maibé, nia dehan kandidatu paretidu polítiku ne’e nafatin mai ho kartaun eleitorál, maibé tuir lei partidu polítiku artigu 13 katak kartaun eleitorál la hateten sai rekezitu ida.
“Tanba ne’e, ha’u haruka fila sira nian dokumentu hodi kompleta fila fali buat balun no sira sei lori mai fali. Sira ko’alia tiha ona ho ha’u sira sei hadi’a atu lori mai fali hodi kumpre rekezitu. Kuandu sira kumpre ona rekezitu legál, Ministériu Justisa rejista sira hanesan partidu polítiku ona,” nia akresenta.
Molok ne’e, kandidatu partidu polítiku foun tolu selu tan hanesan Partidu Timor Forte (PATIFOR), Fitun no Partidu Dezenvolvimentu Sosiál (PDS) halo inkrisaun iha fulan-dezembru 2020, nune’e Ministériu Justisa enkamiña ba Tribunál Rekursu (TR).
Maibé iha fulan-janeiru 2021, Tribunál Rekursu hato’o notifikasaun indefere kandidatu partidu haat ne’e tanba seidauk prenxe Lei Partidu Polítiku númeru 2/2016, 3 fevereiru.
Tribunál Rekursu halo indeferimentu tanba kandidatu partidu balun emblema laloos, númeru apoiante hosi munisípiu seidauk to’o, balun lista asinatura ho ema apoiante ne’ebé hanehan liman la separa maibé tau hamutuk de’it no balun estatutu laloos.
Kandidatu partidu haat ne’e sira-nia apoiante liu rihun rua-nulu (20.000-resin) ho dokumentu kartaun eleitorál apoiante nian maibé la komprova ho apoiante sira-nia identifikasaun sivíl.
Hafoin Tribunál Rekursu indefere inkrisaun kandidatu partidu foun haat ne’e, Os Verdes de Timor mak halo fali re-inkrisaun ba notariadu maibé nafatin la kumpre notifikasaun hosi Tribunál Rekursu, nune’e Ministru Justisa, Manuel Cárceres da Costa indefere diretamente.
Ministru Justisa indefere diretamente re-inskrisaun kandidatu partidu Os Verdes de Timor iha loron 11 juñu 2021 no akordaun Tribunál Rekursu nian sai iha loron 01 jullu 2021.
Ezemplu, nia dehan, se partidu polítiku rekolla kartaun eleitorál to’o rihun 20 tuir lei partidu polítiku maibé tenke komprova ho númeru identifikasaun sivíl.
Hafoin Ministru Justisa indefere, kandidatu partidu Os Verdes halo rekursu ba Tribunál Rekursu nune’e akordaun sai iha loron 01 jullu 2021 hatudu katak desizaun Ministru Justisa, Manuel Cárceres da Costa nian loos, entaun kandidatu partidu Os Verdes de Timor tenke halo rekolla fali apoiante idak-idak sira-nia identifikasaun sivíl.
Notísia relevante: Ministru Justisa indefere direitamente kandidatu partidu Os Verdes
Jornalista: Natalino Costa
Editór : Florencio Miranda Ximenes
