DILI, 09 fevereiru 2022 (TATOLI)–Governu liuhosi reuniaaun ezekutivu iha kuarta ne’e, deside Imprensa Nasionál Timor-Leste (INTL) imprime boletin votu iha Eleisaun Prezidensiál, períodu tinan 2022-2027, ne’ebé sei realiza iha loron 19 marsu 2022.
Projetu Rezolusaun Governu ne’e aprezenta hosi Ministru Administrasaun Estatál, Miguel Pereira de Carvalho.
“Haree ba urjénsia akizisaun boletin votus ne’ebé nesesáriu ba realizasaun Eleisaun Prezidensiál, liuhosi Rezolusaun Governu ne’e, fó autorizasaun ba Sekretariadu Tékniku Administrasaun Eleitorál (STAE) hodi instraura prosedimentu atu define aprovizionamentu liuhosi ajuste diretu, ne’ebé define katak produsaun boletin votu bele realiza hosi Imprensa Nasionál Timor-Leste,” Ministru Prezidénsia Konsellu Ministru, Fidelis Manuel Leite Magalhães, informa, hafoin reuniaun Konsellu Ministru, iha Palásiu Governu.
Notísia relevante: STJ hahú verifika dokumentu kandidatu Prezidente Repúblika na’in-17
Empreza nasionál ne’e Governu nian, entaun Governu deside imprime boletin tanba asuntu ne’e sensitivu.
“Em vez fó sai ba imprime iha fatin seluk, maibé Governu rasik mak imprime liuhosi envolvimentu partisipasaun emprensa nasionál,” Ministru subliña.
Jornalista : Antónia Gusmão
Editora : Julia Chatarina
