DILI, 09 fevereiru 2022 (TATOLI)—Komisáriu Autoridade Aduaneira (AA)/Alfándega, José António Fátima Abílio, hateten, durante períodu pandemia COVID-19, atividade exportasaun no importasaun kontentór iha Timor-Leste la’o maibé ho volume tun.
“Haree hosi kuantidade kontetór ne’ebé tama iha tinan 2021 hamutuk 35.000, enkuantu situasaun normál bele to’o 40.000 to’o 50.000 kada tinan. Ida-ne’e hatudu katak atividade tun tanba nasaun sira ne’ebé halo exportasaun no importasaun mós afeta situasaun hanesan, entaun produsaun hosi fábrika mós tun,” Komisáriu Alfándega relata ba Agência TATOLI, foin lalais ne’e, iha Otél Novo Turismo.
Durante pandemia, hosi kontentór 35.000 ne’e, kontentór exportasaun ne’e entre 500 to’o 600, restu ne’e barak mak sai mamuk.
“Kontentór barak mak sai mamuk ne’e presiza setór privadu sira, liuliu setór produtivu sira no Governu tenke haree atubele iha balansu importasaun no exportasaun, nune’e bele redús mós kustu no labele dependénsia demais hosi rai-li’ur,” nia akresenta.
Notísia relevante: PM preokupa kontentór importa sasán, fila ba rai-li’ur mamuk
Kona-ba reseita, iha tinan 2020 hetan reseita milliaun $65 no iha tinan 2021 hetan $67.
“Ida-ne’e aumenta oituan de’it, ne’e hatudu katak ho situasaun COVID-19 ne’ebé iha afeta duni ba setór ekonomia, liuliu Alfándega atu alkansa ba reseita sira ne’e, maski esforsu hotu ita halo hotu ona,” nia dehan.
Jornalista : Arminda Fonseca
Editora : Julia Chatarina
