DILI, 10 fevereiru 2022 (TATOLI)—Prezidente Komisaun B trata asuntu Negósiu Estranjeiru, Defeza no Seguransa, iha Parlamentu Nasionál, Deputadu José Agostinho Sequeira ‘Somotxo’, husu sidadaun hotu atu kontribui ba pás no estabilidade iha prosesu dezenvolvimentu nasaun nian.
“Pás no estabilidade ne’e la’ós parte PNTL nian de’it mak asegura maibé kontribuisaun sosiedade importante tebes,” Deputadu Somotxo hateten ba jornalista sira iha Parlamentu Nasionál, kinta ne’e.
Iha semana hirak liu-bá, nia preokupa, mosu konfrontu entre arte marsiál Ikatan Keluarga Silat Putera Timor-Leste (IKS PTL) ho arte rituál 77, mezmu nune’e iha ona atuasaun autoridade seguransa no deklarasaun konjuntu liuhosi asinatura hosi lider arte marsiál rua ne’e hodi kontrola membru sira evita konflitu iha sosiedade.
Komisaun B sei bolu Sekretária Estadu Juventude no Desportu (SEJD), Komisaun Reguladora Arte Marsiál (KRAM) ho lidér arte marsiál hodi kria diskusaun, nune’e evita konflitu mosu iha tempu tuir mai.
“Revoga lei hodi reativa arte marsiál maibé bainhira loké mak akontese nafatin konflitu entre arte marsiál mak Estadu prezisa buka solusaun,” nia hateten.
Deputadu Somotxo, husu mós autoridade seguransa atu halo investigasaun kle’an ba kazu omesídiu ne’ebé deskonfia sona mate António de Jesus, iha Elemloi-Delta, suku Comoro, postu administrativu Don Aleixo, munisípiu Dili, segunda foin lalais no kazu omesídiu Levi Gomes iha Bebonuk.
“Polísia presiza investigasaun no hodi hatene loloos mate sira kria instabilidade iha ita-nia rain nia objetivu saida no sé mak halo,” nia dehan.
Tuir nia, kazu sona malu presiza investiga no analiza kle’an hosi fatór saida mak akontese ne’ebé bele mai hosi ódiu vigansa entre ema individuál ka konsumu buat ruma hodi to’o hamate ema seluk nia vida, nune’e parte hotu presiza buka hatene.
Tanba ne’e, nia husu presiza sosiedade tomak nia konsiénsia hatene nia dever no direitu hodi iha Timor-Leste.
Notísia Relevante: PNTL identifika suspeitu na’in-10 envolve konfrontu iha Tasi-tolu
Jornalista : Nelson de Sousa
Editór : Cancio Ximenes
