Treinadór futeból na’in-22 termina formasaun hodi hetan lisensa B

DILI, 18 fevereiru 2022 (TATOLI)– Treinadór futeból hamutuk na’in-22, sesta ne’e, termina formasaun, durante fulan haat ba lisensa B ne’ebé fó hosi Federasaun Futeból Timor-Leste (FFTL) liuhosi kontrata instrutór hosi Asian Football Confederation (AFC).
“Ohin, ita nia treinadór na’in-22 mak termina ona sira nia formasaun, sira ne’e ba futuru ita prepara sira atu hetan fali formasaun ba lisensa A nian, atu ba oin sira bele fó treinamentu ba ita nia selesaun no klube sira iha Timor-Leste. Tanba ba lisensa A nian ami sei ko’alia ho AFC oinsá haruka tan instrutór ida mai hamutuk ho Gopal atu fó formasaun ba treinadór sira,” Prezidente FFTL, Francisco Martins da Costa Pereira Jerónimo, hateten ba Agência TATOLI iha ámbitu enseramentu ba formasaun ne’e iha edífisiu FFTL-Dili.
Formasaun ba lisensa B ne’e hahú kedan iha tinan kotuk no fahe ba grupu rua A no B ne’ebé grupu A hamutuk treinadór na’in-33 termina ona iha tinan kotuk no grupu B nian mak foin termina formasaun.
“Treinadór ne’e foin termina ona kursu, maibé avaliasaun hosi instrutór atu pasa ou la’e ne’e seidauk, instrutór mak sei halo avaliasaun direita atu hatene sira na’in-hira mak liuba hetan sertifikadu B no na’in hira mak la liu, hanesan iha faze primeiru nian hamutuk na’in 33 maibé liu de’it 23 seluk la liu,”Prezidente FFTL ne’e akresenta.
Prezidente Francisco Martins dehan treinadór sira ne’ebé hetan ona formasaun, maibé la konsege pasa no la hetan sertifikadu, FFTL sei iha oportunidade atu tuir nafatin treinamentu, nune’e bele hetan sertifikadu bainhira instrutór halo avaliasaun di’ak ona.
Durante tinan haat, FFTL konsege fó ona formasaun ba treinadór futeból kuaze 100-resin no barak mak agora ka’er hela klube sira iha Liga Futeból Timor-Leste (LFTL) balun kaer hela selesaun nasionál feto no mane hosi U-19, U-15 no balun ka’er iha juveníl inklui balun sai asistente treinadór ba selesaun nasional U-23 no seniór.
Notísia relevante:FFTL fó formasaun báziku ba treinadór na’in-19
Jornalista: Hortencio Sanchez
Editór : Florencio Miranda Ximenes

