DILI, 20 fevereiru 2022 (TATOLI) – Juventude na’in-65 hosi suku Sabu-Rai, uma lisan Siligata no Monu-Salos, munisípiu Bobonaro, deklara apoia kandidatura númeru 1 Isabel da Costa Ferreira iha eleisaun prezidensiál.
Koordenadór Juventude Movimentu apoia kandidatura Isabel da Costa Ferreira, Jacinto Batista katak, juventude na’in-65 ne’ebé deside apoia kandidatura ne’e tanba haree karaterístika figura Isabel Ferreira ne’ebé simples, tán ne’e sira hakarak fó votu ba nia nu’udar feto ida-ne’ebé poténsia.
“Durante ne’e ami haree mane de’it mak sai Prezidente Repúblika tanba ne’e ho figura simplisidade kandidatura ne’e nian movimentu hamriik atu fó votu konfiansa atu nia bele sai Prezidente Repúblika feto dahuluk iha 2022-2027 ne’e,” Koordenadór Jacinto ko’alia iha Heliport, Bairru-Pité, domingu ne’e.
Juventude Movimentu sei esforsu ne’e iha Bobonaro liuhosi preparasaun sira nune’e kandidatura Isabel Ferreira hetan votu konfiansa iha eleisaun prezidensiál.
Koordenadór movumentu fó-sai katak, bainhira preparasaun sira-ne’e prontu ona, movimentu ne’e sei serbisu maka liuhosi kampaña door to door atu hetan liután apoiante hodi garante susesu ba kandidatura Isabel da Costa Ferreira nian iha eleisaun prezidensiál.
“Ita-nia movimentu ne’e ezije ona atu foti ezemplu buletin votu hodi ba hahú ona kampaña door to door iha Bobonaro maibé ha’u dehan hein lai, ita labele fó risku ba ita-nia kandidatura. Bainhira STAE ofisializa ona atividade kampaña maka ita foin bele entrega ezemplu buletin votu atu lori ba halo kampaña,” tenik nia.
Jornalista : Tomé Amado
Editór : Evaristo Soares Martins
