FHTL hahú prepara atleta na’in-tolu ba partisipa Sea Games

DILI, 21 fevereiru 2022 (TATOLI)- Federasaun Halterofelizmu Timor-Leste (FHTL) hahú prepara atleta na’in-tolu liuhosi fíziku no tékniku hodi partisipa eventu internasionál Sea Games ne’ebé realiza iha loron 12 to’o 14 maiu, iha nasaun Vietname.
Atleta Halterofelizmu (hit besi) Timor-Leste, Anastácio da Costa, hateten nia parte sente orgullu tanba hetan fiar hosi federasaun hodi reprezenta Timor-Leste hosi modalidade Halterofelizmu iha Sea Games iha Vietname tinan ne’e.
“Ami hahú prepara-an durante fulan ida ona, ami prepara an kedas nuudar atleta, bainhira Konfederasaun Desportiva Timor-Leste (CDTL-sigla Portugés) fó sai ami nia naran ha’u ho kolega na’in rua ami hahú kedan prepara fíziku no tékniku no tuir programa,” Atleta ne’e hateten ba Agência TATOLI iha nia fatin treinamentu Strong Gym Dili, segunda ne’e.
Notísia relevante: FFTL hahú prepara ekipa futeból partisipa SEA Games
Nia dehan nuudar atleta ne’ebé reprezenta Timor-Leste ba partisipa iha Sea Gsames hakarak oferese buat ruma ba Timor -Leste, nune’e nia parte sei esforsu makas atu oferese buat ruma ba Timor-Leste liu hosi sira nia modalidade.
“Ita iha tarjetu, maibé ba ami Halterofelizmu hakarak oferese netik buat ruma ba ita nia nasaun tanba durante tinan barak ami la’o ba eventu internasionál seidauk oferese buat ruma ba nasaun ne’e,” nia kompromete.
Maske, atleta sira nia preparasaun seidauk másimu, nune’e nia seidauk deklara preparadu ou seidauk preparadu, maibé kompleta ona fulan tolu mak foin ko’alia sai preparadu ou lae.
“Bainhira iha fulan tolu nia laran ami prepara hotu ikus liu ami hare ba kondisaun sira hotu loos ona mak ami foin ko’alia katak ami preparadu, maibé hanesan atleta prepara an nafatin,” nia relata.
Treinamentu ba atleta hirak ne’e la’o normál no laiha fallansu tanba hetan tulun hosi Governu liuliu Sekretáriu Estadu Juventude no Desportu (SEJD) atribui ona osan ba sira hanesan alimentasaun hodi hala’o preparasaun durante fulan tolu.
“Treinamentu ami hala’o kada loron, la’ós atu ba partisipa iha Sea Games mak ami foin treinu ne’e, maibé antes ne’e ami treinu hela kada loron, durante ne’e difikuldade mak alimentasaun maibé Governu ho federasaun apoia ona uitoan mai ami hodi hola hahan no seluk tan ami sente di’ak ona,” nia hateten.
Alteta ne’e konfiansa hosi FHTL tanba dala tolu ona reprezenta Timor – Leste iha eventu internasional mak hanesan eventu WBBF iha Thailandia 2016, AFBB iha Xina 2018 no AFBB iha Bali Indonézia iha 2019.
Notísia relevante: Atleta Karate-do na’in-lima preparadu kompete iha Sea Games
Jornalista: Hortencio Sanchez
Editór : Florencio Miranda Ximenes

