DILI, 22 fevereiru 2022 (TATOLI)–Governu liuhosi Ministériu Koordenadór Asuntu Ekonómiku (MKAE) no Ministériu Justisa (MJ), iha loron 03 janeiru 2022 selebra ona akordu espesiál investimentu no arrendamentu ho empreza Pelican Paradise Group Limited, nune’e fó biban atu kontinua prosesu.
Konta hosi asina akordu to’o loron-90 mak realiza projetu ne’e, tanba ne’e Governu iha ona planu, iha semana dahuluk fulan-abríl tinan ne’e sei realiza seremónia hatuur fatuk dahuluk iha área projetu.
“Iha bloku tolu mak atu ezekuta daudaun, nune’e bloku ida iha empreza ida. Iha faze dahuluk tuir pedidu ne’ebé haruka ona ba Ministru Koordenadór Asuntu Ekonómiku no Prezidénsia Konsellu Ministru, katak hela tan semana rua ekipa hosi empreza responsável projetu iha ona Timór hodi realiza seremónia hatuur fatuk dahuluk ba projetu iha Tasi-tolu,” Diretór Ezekutivu TrandeInvest, Arcanjo da Silva, informa ba Agência TATOLI, iha ninia knaar fatin, Colmera, tersa ne’e.
Notísia relevante: Governu no Pelican Paradise selebra akordu investimentu espesiál
Iha faze dahuluk, iha bloku ida mak konstroe uluk otél no apartamentu, enkuantu bloku seluk halo reflorestasaun ba foho sira.
Aleinde ne’e, projetu ne’e iha faze dahuluk sei fó serbisu ba timor-oan hamutuk 1.000 no faze daruak sei kontinua tuir kalendáriu serbisu no kontratu hosi parte rua.
Investimentu ne’e sei kompleta ho dezenvolvimentu iha lote 19, iha rai hamutuk ektare 556,63, ne’ebé lokalizasaun entre Tasi-tolu no Tibar.
“Bloku tolu ne’ebé mak atu implementa projetu, daudaun ne’e mamuk ona, ne’ebé hakarak ka lakohi to’o loron 90 ne’e tenki realiza ona tanba molok realiza asina akordu ne’ebé sira iha ona komprimisu ba ida-ne’e,” nia dehan.
Bainhira asina akordu dahuluk iha tinan 2008, empreza halo estimatimasaun katak dezenvolvimentu ne’e bele gasta to’o millaun $250, maibé tanba atrazu implementasaun no revizaun ba planu sira, maka kálkulu osan ne’ebé sei gasta aumenta.
Aleinde ne’e, iha área konstrusaun, reforestasaun, agrikultura, no kampu golf kobre 82% no otél no komersiál sira 18%.
Proposta investimentu empreza internasionál hosi Malázia ne’e hahú kedas iha tinan 2008, iha V Governu Konstitusionál ninia tempu, ne’ebé antes ne’e lidera hosi Primeiru-Ministru, Kay Rala Xanana Gusmão.
Nune’e, Governu hasai rezolusaun númeru 33/2015, 05 outubru no aprova hodi hahú konstrusaun, ne’ebé kontratu empreza ho Governu iha inisiál ba tinan 50 no posibilidade sei renova ba tinan 50.
Pelican Paradise sei sai mother company ba empreza hamutuk 20 hosi nasaun Singapura no Malázia, ne’ebé sei hamutuk implementa projetu boot ne’e.
Antes ne’e, iha loron 22 janeiru 2018, VII Governu Konstitusionál atribui ona sertifikadu investimentu ba empreza estranjeiru ne’e hodi halo investimentu turístiku.
Hafoin atribui sertifikadu investimentu hosi Tradelnvest, tuir planu konstrusaun ne’e sei hahú iha loron 31 marsu 2018, ne’ebé ba dahuluk harii otél liuhosi konkursu internasionál.
Iha aprezentasaun, ekipa hosi Pelican Paradise fó atensaun maka’as ba ambiente, nune’e sei kuda ai-horis iha foho lolon no fatin ne’ebé mak ai-horis laiha, nu’udar parte ida hosi re-florestasaun, tanba ne’e Governu mós apresia inisiativa ne’e.
Jornalista : Antónia Gusmão
Editora : Julia Chatarina
