Top

Observadór internasionál buka hatene prepativu Horta ba kampaña presidensiál

Prezidente Partidu CNRT, Kay Rala Xanana Gusmão no Kandidatu Prezidente Repúblika hosi partidu CNRT, José Ramos Horta. Imajen/CNRT

DILI, 22 fevereiru 2022 (TATOLI) – Koordenadór Jerál ekipa susesu Kandidatu Prezidente Repúblika, José Ramos Horta, Thomas do Rasario Cabral, hala’o enkontru ho reprezentante Misaun Obserbadór Eleitorál Uniaun Europeia (UE) iha Timor-Leste hodi atualiza kona-ba preparativu kandidatu nian hodi hasoru eleisaun presidensiál.

Iha enkontru ne´e mós koalia kona-ba armónia iha sede nasional kandidatu independente, José Ramos Horta ho númentu 14. Observador sira mós buka hatene preparativu ba matéria no programa kampaña, preparasaun lojístika ho administrasaun no kestaun tékniku seluk ho objetivu atu evita aktu krime eleitorál

Thomas haktuir UE mós preokupa kona-ba ema sira ne’ebé servisu iha sentru votasaun tanba tuir sira tenke imparsiál hodi garante sentru votasaun paralelu bele hala’o iha teritóriu Timor-Leste no estranjeiru ho susesu.

“Ita nia resposta ba sira kona-ba asuntu hirak ohin sira husu ne’e, responsabilidade Estadu-nian, husi kandidatura ne’ebé CNRT apoiu José Ramos Horta, ami-nia pozisaun mak sei hakribi violénsia, ita tenke kria fatin ida paz, nune’e eleisaun bele la’o ho susesu, tanba eleisaun ba tinan ida-ne’e importante tebe-tebes atu Estadu ne’e funsiona ho di’ak. CNRT informa ona ba estrutura to’o iha baze, atu mantein pá no estabilidade to´o iha rezultadu eleisaun”, hateten Thomas liuhosi komunikadu ne’ebé TATOLI hetan asesu.

Delegasaun Misaun Obserbadór Eleitorál UE kompostu hosi Xefe Adjuntu Misaun Obserbadór Eleitorál Uniaun Europeia (UE), Alexander Gray ho ekipa Cristina Alves, Margarina Alves no Michel Hiauver aprezenta pozisaun UE hodi akompaña direta prosesu eleisaun bele la’o ho susesu, justu no demokrátiku iha teritóriu no diáspora.

UE preokupa mós kona-ba situasaun seguransa iha Timor-Leste, maibé Koordenadór Jerál Kandidatu Prezidente Repúblika, Thomas do Rasario Cabral klarifika katak, asuntu seguransa kabe ba Estadu no Governu Timor-Leste hodi koloka forsa Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL).

Thomas hatete, EU mós preokupa kona-ba kobertura média sira-nian imparsiál ka lae durante prosesu kampaña to’o eleisaun, maibé asuntu ne’e kompeténsia Konsellu Imprensa no mídia sira iha Timor-Leste hodi aprezenta sira-nia proposta ba Sekretaradu Tékniku Admistrasaun Eleitorál (STAE), Comição Nacional Eleições (CNE) no Konsellu Imprensa (CI) maka sei kontrola direita servisu órgaun komunikasaun sosiál ne’ebé hetan ona akreditasaun alias jornalista sira tenke iha kartaun karteira profisionál.

“Sira-nia preokupasaun kona-ba kobertura mídia, bele imparsiál ka lae, tanba ne’e mak ami hateten ba sira, katak se mídia, misaun observadór nia papel atu ko’alia ho CI. Ba kandidatu ami buka meiu hothotu, oinsá ami-nia programa ne’e mídia sira bele halo kobertura hodi hato’o ba povu”, Thomas informa.

CNRT fó ona formasaun ba fiskál partidu nian hamutuk 5.600 resin, no fiskál sira ne’ebé atu hetan kredensiál iha STAE hamutuk 5.439 destaka iha sentru votasaun sira hotu iha teritóriu nasionál no  diáspora.

Entretantu, VIII   Governu Konstitusionál liuhosi Ministériu Administrasaun Estetál (MAE) ho STAE prepara kondisaun hotu hodi realiza eleisaun presidensiál iha loron 19 fulan-marsu 2022.

Tuir dadus provizóriu resensiamentu eleitorál no atualizasaun baze de dadus 2021, eleitór hamutuk 857.487 ne’ebé kompostu hosi Munisipiu AIleu 33.727, Ainaro, 44.571, Baucau 95.142, Bobonaro 69.822, Covalima 47.935, Dili 190.750, Ermera 82.931, Lautem 48.297, Liquça 50.965, Manatutu 35.422, Manufahi 40.308, Rejiaun Administrativa Espesiál Oé-cusse Ambeno (RAEOA) 51.005 no Viqueque hamutuk 59.612.

Entretantu, kona-ba dadus resensiamentu eleitorál ba eleitór sira iha Asútralia 1.489, Koreia do Súl 1.262, Irlandia 1.251, Portugál 762, no Reinu Unidu hamutuk 2,236.

Jornalista : Osória Marques

Editór : Zezito Silva

Publisidade

Leave a Reply

Latest Post

error: Content is protected !!