DILI, 23 fevereiru 2022 (TATOLI)— Diretór Escola Portuguesa Ruy Cinatti Díli (EPD), Acácio de Brito, informa estudante na’in-25 no funsionáriu na’in-rua mak intefadu ka pozitivu COVID-19.
“Daudaun ita-nia estudante na’in-25 no funsionáriu na’in-rua halo hela auto izolamentu iha uma, signifika totál hamutuk ema na’in-27 mak infetadu ho COVID-19 ka variante Omicrom,” Diretór Acácio hateten ba Agência TATOLI iha nia knaar fatin Balide-Dili, kuarta ne’e.
Diretór Acácio dehan, iha tinan kotuk totál alunu no funsionáriu EPD hamutuk 243, ne’ebé ekivalente 17,99% mak infetadu ho COVID-19.
Diretór ne’e dehan profesór no alunu sira husi idade 12 to’o menus 18 kompleta ona vasina kontra corana virus. Nune’e atividade prosesu apredizajen kontinua la’o normal.
“Alunu sira mantein nafatin kumpre medida prevensaun ba COVDID-19 nian hanesan uza máskara, hand sanitizer no distansiamentu sosiál,” nia akresenta.
Totál estudante iha Escola Portuguesa Ruy Cinatti Díli (EPD) hamutuk 1.237 no professor na’in-48
Tuir dadus estatístika Ministériu Saúde (MS) relata, kazu pozitivu foun iha loron tersa (22/02) hamutuk 79, rekuperadu 219 no kazu ativu 937.
Nune’e, hahú 21 marsu 2020 to’o 22 fevereiru 2022 iha kumulativu kazu konfirmadu 22.485 no óbitu 125.
Jornalista : Felicidade Ximenes
Editór : Florencio Miranda Ximenes
