BAUCAU, 24 fevereiru 2022 (TATOLI) – Sentru Produsaun Fini Triloka iha tinan ne’e sei distribui fini hare nakroma hamutuk tonelada hitu hodi distribui ba agrikutór sira.
Ofisiál fini MAP Baucau, Basilio da Silva Pires, hateten, tinan ne’e sentru produsaun fini Triloka prepara fini hare nakroma hamutuk tonelada hitu ne’ebé sei distribui ba munisípiu 12 la inklui Bobonario.
“Sentru kobre hotu kedas, ita fahe fini ba Viqueque, Lospalos, Manatuto, Aileu, Ermera, Liquiçá, no Same, ne’e grupu produtór komersiál liuliu ba hare,” Ofisial fini hateten iha Triloka, kinta ne’e.
Sentru produsaun fini Triloka durante ne’e prepara fini hare klase fundasaun kada tinan hamutuk tonelada ida.
Alende ne’e prepara mós fini ba fore-rai klase fundasaun tonelada ida no klase sertifikadu tonelada haat kada tinan.
Sentru refere iha fasilidade mini laboratóriu ne’ebé funsiona atu teste ba fini liuliu ai-han sira hodi produs no distribui ba grupu fini sira-ne’ebé eziste iha área sentru leste.
“Klase fini reponsabliza hosi peskizadór sira, fini fundasaun hosi nasionál mak produs, ha’u rasik mak produs fini fundasaun no fini sertifikadu,” Basilio komenta.
Iha Baucau grupu ne’ebé produs fini hamutuk 12, fini ne’ebé durante ne’e produs mak hanesan hare, batar no fore-rai ne’ebé eziste iha Triloka, Venilale, Laga no Vemase bazea ba poténsia área produsaun ai-han no tuir planu sei estabelese tán grupu produsaun iha Baguia iha tinan oin.
Objetivu hosi estabelesimentu sentru produsaun fini mak alende halo análize kualidade, sentru refere apoia kapasitasaun ba grupu sira atubele hamenus fini importasaun hosi rai-li’ur.
Sentru produsaun fini Triloka rasik hahú eziste iha tinan 2016, ne’ebé durante ne’e prepara produs fini hanesan hare, batar, fore-rai, foremungu, fehuk no ai-farina no distribui ba grupu produtór sira kuda iha teritoriu nasionál.
Jornalista : Natalino Belo
Editór : Evaristo Soares Martins
