DILI, 25 fevereiru 2022 (TATOLI)-Prezidente Repúblika, Francisco Guterres Lú olo, sesta ne’e, simu ona karta kredensiál husi Embaixadór Austrália foun ba Timor-Leste, Willian Terrence Costelo, iha edifísiu Palásiu Prezidensiál, Bairru Pite Dili.
“Ohin aprezenta karta kredensiál ba Prezidente Repúblika hodi Embaixadór foun Austrália nian iha Timor-Leste hahú hala’o atividade,”Vise Ministru Negósiu Estranjeiru no Kooperasaun, Julião da Silva, hateten ba jornalista iha Palásiu Prezidensiál Dili.
Notísia Relevante :Embaixadór Peter Roberts kompromete hametin relasaun TL-Austrália
Mandatu kada embaixadór foun mai Timor-Leste ne’e, normalmente durante tinan tolu to’o haat.
Embaixadór Willian Terrence Costelo subtitui embaixadór sesante Peter Robert ne’ebé maka ninia mandatu remata iha tinan 2021 liubá.
“Loloos karta kredensiál ne’e aprezenta ona iha tinan kotuk maibé ho situasaun COVID-19 nune’e foin bele entrega,”nia hateten.
Tuir nia hafoin simu karta kredensiál ne’e, Prezidente Repúblika Francisco Guterres Lú Olo agradese ba Governu Austrália tanba fó apoiu ba prosesu dezenvolvimentu nasaun nian liu-liu iha área rekursu umanu no seluk tan.
Vise MNEK ne’e hatutan, Xefe Estadu mós kontinua husu ba Governu Austrália atu apoiu Timor-Leste liliu atu aselera prosesu instalasaun ba projetu kabu marinu ka (Fiber Optical) mai TL, nune’e bele tulun komunidade sira atu asesu rede telekomunikasaun ho di’ak liután.
Nune’e mós husu ba Ministériu Negósiu Estranjeiru no Kooperasaun atu kontinua servisu hamutuk ho Governu Austrália hodi oferese bolsu estudu ba Timoroan sira no mós projetu portu Navál Hera.
Ikusliu, husu atu kontinua simu Timoroan bá servisu iha Austrália liuhosi programa seasonal worker no pasific labour skills.
Notísia Relevante :Embaixadór Austrália hato’o despedida ba Prezidente Repúblika
Jornalista :Nelson de Sousa
Editór : Agapito dos Santos
