TR laiha kompeténsia interpreta buletin votu uza fotografia rua

DILI, 02 marsu 2022 (TATOLI)—Tribunál Rekursu (TR), indefere ka lasimu pedidu hosi reprezentante legál kandidatu Prezidente Repúblika ho númeru sorteiru 6, Francisco Guterres ‘Lú Olo’, ne’ebé husu atu halo interpretasaun ba kandidatu PR seluk ne’ebé uza fotografia rua iha buletin votu tanba laiha kompeténsia.
Reprezentante legál kandidatu númeru sorteiru 6, Fernando Gusmão, hateten iha loron 28 fevereiru ne’e reprezentante kandidatu PR hosi sira-nia parte aprezenta karta ba TR kona-ba pedidu interpretasaun artigu 38 hosi lei númeru 15/2021, 14 jullu, sesta alterasaun lei númeru 7/2006, 28 novembru, lei eleitorál ba Prezidente Repúblika.
Bainhira iha reuniaun CNE aprova buletin votu reprezentante kandidatu nian mós hato’o ona hanoin katak prosesu eleisaun prezidensiál atu hili Xefe Estadu ne’ebé lidera órgaun prezidensiál nia mesak de’it katak órgaun singular ou unipesoál.
“Tanba ida-ne’e mak ita kestiona kandidadu ho númeru sorteiru 11 ho 14 iha buletin votu ne’ebé hatama fotografia rua ka uza sira-nia fotografia uza mós fotografia hosi ema seluk nian la’ós kandidatu nian,” Fernando Gusmão hateten liuhosi konferénsia imprensa ba jornalista sira iha sede nasionál kandidadu PR Lú Olo, iha salaun Luz Clarita, kuarta ne’e.
Ho ida-ne’e, tuir nia, povu maiória ne’ebé bele hamosu konfuzaun iha públiku liu-liu eleitór sira no sira konsidera katak viola lei eleitorál Prezidente Repúblika, nune’e hatama pedidu ba TR hodi halo interpretasaun legál.
TR indfere tanba laiha kompeténsia atu interpreta
Fernando Gusmão informa, iha loron 01 marsu 2022, TR hasai akordaun hodi indefere pedidu refere ho razaun la’ós tanba laiha fundamentu iha argumentu sira maibé tanba de’it TR deklara laiha kompeténsia ba halo interpretasaun artigu 38 ne’e.
TR deklara katak konstituisaun RDTL iha artigu 126, alinéa 2 fó de’it kompeténsia ba Supremu Tribunál Rekursu (STJ) iha área eleisaun nian mak hanesan verifika rekezitu legál sira ba kandidatu PR, julga iha ultima instánsia kona-ba regularidade no validade aktu prosesu eleitorál nian, tuir lei eleitorál nian, valida no proklama rezultadu prosesu eleitorál.
Nune’e, TR laiha kompeténsia atu julga kona-bá buletin votu no kompeténsia ne’e ba Komisaun Nasionál Eleisaun (CNE, siglá portugés) tuir artigu 38 alinéa 2 lei eleitorál ba Prezidente Repúblika nian.
Reprezentante kandidatu hosi Lú Olo, hakarak rekomenda iha tempu oin mak Parlamentu Nasionál presiza halo alterasaun ba lei eleitorál ba Prezidente Repúblika hodi introdús kompeténsia TR nian iha rekursu ruma ne’ebe aprezenta hosi ekipa susesu ka kandidatu ba eleisaun prezidensiál rasik ne’ebé la konkorda ho desizaun CNE nian kona-ba buletin votu.
“Presiza haree artigu 38 hodi halo alterasaun ida fó mós kompeténsia ba iha Tribunál Rekursu, nune’e kandidatu balun liuhosi nia reprezentante la konkorda ho buletin votu bele halo rekursu ba Supremu Tribunál Justisa,” nia dehan.
Jornalista : Nelson de Sousa
Editór : Cancio Ximenes

