iklan

NASIONÁL, HEADLINE, KAPITÁL

Traballadór timor-oan ida mout iha tasi Koreia Súl

Traballadór timor-oan ida mout iha tasi Koreia Súl

Ró peska no traballadór mout bainhira halo hela serbisu, iha tasi, Koreia Súl, kuarta (02/03). Imajen/Espesiál

DILI, 02 marsu 2022 (TATOLI)Traballadór timor-oan na’in-ida hosi munisípiu Bobonaro, kuarta ne’e, hetan insidente ho ró mout ba tasi-laran iha Koreia Súl bainhira halo hela serbisu.

Akontesimentu iha kapitál Pohan, postu Uljing, iha tasi Mangyangjeong, ho ró númeru 99-1 (36340).

Traballadór na’in-rua hanesan, Marcos Mateus Lopes hosi Ermera no Cosme Freitas hosi Manufahi konsege salva-an hosi tasi, enkuantu Armando Abel do Santos hosi postu Cailaco, Bobonaro, mout ba tasi okos no daudaun baixa iha hela kuidadu intensivu ospitál Koreia Súl.

Cosme Freitas, haktuir, ohin madrugada maizumenus tuku 02:00 oras lokál, sira ba tasi kail ikan hodi mai fa’an iha rai-maran.

Iha akontesimentu ne’e, iha timor-oan na’in-tolu, indonéziu ida no kapitaun ró inklui na’in ba empreza.

“Ami fa’an ikan hotu filafali ba tasi no troka rede foer, ha’u ho patraun ho ró kiik no sira na’in-haat ho ró boot, atu hit sai rede mak ró todan to’o halis no baku fila, entaun traballadór timor-oan ida seluk ho naran Marcos Mateus Lopes hosi Atsabe konsege haksoit sai no ami ho ró kiik simu nia, enkuantu traballadór indonéziu no timor-oan Armando Abel dos Santos inklui kapitaun ró duku sira,” Cosme Freitas, konta tuir ba Agência TATOLI, via telefónika.

Notísia relevante: Traballadór 94 arranka bá Koreia Súl no rua kansela viajen

Akontesimentu ne’e maizumenus tuku 05:00 oras lokál no tenta salva traballadór na’in-tolu iha tuku 08:00 oras lokál, tanba bainhira akontese konsege haleu ró mout ne’e atu hasai vítima, maibé labele tanba ró no rede taka sira halo sira nani sai ladi’ak.

“Entaun patraun ho sira ró kiik filafali ba rai-maran no bolu Polísia ho ró boot mak ba konsege tula sai sira na’in-tolu hosi tasi. Maibé bainhira hiit sa’e sira na’in-tolu, ita haree todan hotu no daudaun iha hela ospitál, ne’ebé mate ka moris ita seidauk bele hatene tanba ema-nia ekipamentu médiku kompletu,” nia dehan.

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!