BAUCAU, 03 marsu 2022 (TATOLI)–Kandidatu Prezidente Repúblika (PR) períodu 2022-2027, ho númeru sorteiu 13, Martinho Germano da Silva Gusmão, hala’o kampaña loron daruak iha Darsula, suku Gariuai, postu Baucau villa, munisípiu Baucau.
Durante kampaña, kandidatu independente ne’e introdús prioridade tolu hanesan revolusaun edukasaun, hatuur hikas justisa no haburas kultura ba dame.
“Tanba sá presiza revolusaun edukasaun? ha’u bele dehan katak istória igreja iha Timór ne’e loke edukasaun no Portugal tama iha Timór iha 1915 maka loke eskola dahuluk iha Dili, maibé eskola ba de’it mistisu nia oan no liurai nia oan, enkuantu Timór nia oan la hetan eskola. Antes ne’e, tinan 1770 igreja loke semináriu rua (Oé-cusse no Manatuto), ne’e duni igreja loke eskola atu eduka Timór nia oan sira bele hakerek, ko’alia no bele sai matenek. Ha’u hakarak halo revolusaun ba edukasaun atu fó fali ba foin-sa’e sira futuru ne’ebé loos,” Martinho Gusmão hateten durante kampaña iha suku Gariuai, kinta ne’e.
Notísia relevante: Martinho Gusmão kandidata an ba PR atu dezenvolve sosiedade solidáriu-fraterna
Kandidatu PR ne’e atu halo revolusaun edukasaun, liuhosi hasa’e profesór nia kualidade moris, promove dalen tetum, portugés, ingles ho indonézia inklui haburas domin ba sani livru, nune’e sei propoin ba Governu atu hasa’e Orsamentu Jerál Estadu (OJE) ba edukasaun 10% to’o 20%.
“Bainhira povu fó fiar maka sei hasa’e profesór sira-nia saláriu, tanba durante ne’e kiik tebes. Ha’u hatene kondisaun no situasaun profesór sira, tanba ha’u mós mestre. Bele dehan profesór sira iha estranjeiru ninia saláriu kiik liu $800, maibé iha Timor-Leste saláriu profesór nian $300 mai kraik, tanba ne’e ha’u hakarak ida-ne’e sei akontese iha Timór,” nia kompromete.
Hatuur hikas justisa, refere ba promotór atu harii sosiedade Timor-Leste hodi hatuur iha ‘justisa sosiál’ hamoris no haburas, ‘bem estar materiál no esperituál’, ba Timor-Leste hotu, no kompromete povu no ondra hodi kumpre Konstituisaun no símbolu, garante regula funsionamentu instituisaun demokrátiku sira, tanba Prezidente Repúblika mak tau-matan uluk ba prinsípiu separasaun podér ne’ebé iha interdependénsia ba podér.
Enkuantu, haburas kultura ba dame, sai promotór ba Konstituisaun iha nasaun justu, prósperu, no dezenvolvimentu sosiedade solidária no fraterna, ne’ebé tau ba moris loron-loron povu nia ho ‘profundu sentimentu’, tuir povu-nia hakarak no mehi sira, inklui povu nia fiar ba Maromak.
Iha biban hanesan, Koordenadór Jerál ekipa susesu, Silvestre Sufa, enkoraja populasaun Baucau atu vota ba Kandidatu PR, Martinho Gusmão, ne’ebé nu’udar mós Baucau-oan.
“Tempu to’o ona figura foin-sa’e avansa ba-oin, vota ba Kandidatu Martinho Gusmão, vota ba dezenvolvimentu, tanba ne’e jerasaun foun labele lakon ho sira seluk, tanba jerasaun foun mós iha kualidade no kapasidade atu bele ukun, hodi dezenvolve nasaun,” nia otimista.
Durante kampaña Kandidatu PR ne’e hetan seguransa másimu hosi membru Polísia Nasionál Timor-Leste (PNTL) no hetan observasaun hosi Provedoria Direitu Umanu no Justisa (PDHJ, sigla portugés), Komisaun Nasionál Eleisaun (CNE, sigla portugés) no observadór Uniaun Europeia, ne’ebé kampaña la’o ho situasaun hakmatek.
Tuir ajenda, Kandidatu PR Martinho Gusmão, iha sesta (04/03) sei kontinua kampaña iha postu administrativu Ossu, munisípiu Viqueque, hahú tuku 14:00 to’o 16:00.
Jornalista : Antónia Gusmão
Editora : Julia Chatarina
