Nataniel hakarak mantein ho Karketu iha époka 2022

DILI, 07 marsu 2022 (TATOLI)- Jogadór Karketu Dili FC ho númeru kamijola 8, Nataniel Reis, hateten nia parte sei hein hela kontaktu hosi lideransa karketu tanba iha époka ne’e hakarak mantein nafatin ho Karketu.
“Tinan ne’e ha’u hakarak nafatin ho Karketu, maibé sira seidauk kontaktu ha’u atu hamutuk ho sira, se sira la kontaktu ha’u sedu, klube ruma kontaktu ha’u hodi halo preparasaun sedu ha’u bele ba ona,” Jogador Nataniel ba Agência TATOLI iha edifisiu Federasaun Futeból Timor-Leste (FFTL) Dili, segunda ne’e.
Daudaun ne’e, klube primeira divizaun balun kontaktu ona nia, maibé konfidensial hela seidauk fó sai ba públiku tanba sei hein desizaun hosi Karketu ba nia.
Nataniel hanesan jogadór eroi ida ba Karketu iha époka 2021 lori Karketu manán Ponta Lesteho golu úniku ne’ebé nia rasik mak ezekuta fó kedan vitória ba Karketu sai hanesan ekipa vensedór Liga Futeból Timor-Leste.
Kontratu Nataniel hamutuk ho Karketu termina ona iha 2021 no iha 2022 seidauk iha kontratu foun ba nia, ho nune’e agora daudaun jogadór ne’e sei livre kontratu hosi Karketu.
Tanba ne’e, iha klube balun komesa tau matan ona ba nia atu kontratu, maibé nia seidauk iha desizaun atu foti.
Ho nune’e, LFTL hahú loke ona janela transferensia ba klube sira atu rejista jogadór sira nia naran, nune’e bele partisipa iha liga tinan ne’e.
Tuir kalendariu tentativa LFTL nian liga sei halao iha abril-novembru.
Ho nune’e TATOLI tenta kontaktu ho Sekretariu Jeral Karketu Elizeu Isaac maibé hatete, klube seidauk iha preparasaun.
“Ita seidauk iha preparasaun, maibé iha ona preparasaun ami sei fó sai ba públiku,” nia dehan.
Esperiénsia Nataniel
Nataniel hanesan jogadór antigu iha Boavista, bainhira Boavista sei uza naran Carsae FC.
“Ha’u ne’e hamutuk ho Boavista uluk kedan bainhira Boaviosta sei naran Carsae FC komesa iha tinan 2015-2017 mak troka ba Boavista, ha’u nafatin ho sira hosi 2018-2020 no 2021 ha’u muda ba Lalenok no mai fali iha Karketu,” nia esplika.
Nataniel hanesan mós jogadór selesaun nasionál. Bainhira tama ba selesaun nasionál Nataniel hahú uluk nia karreira hanesan jogadór sentru juveníl iha 2006 iha U-12, 2009 komesa hamutuk iha U-16 no 2013 nia muda ona ba U-19.
Hosi esperiénsia ne’ebé iha jogadór ne’e hetan fiar hosi Federasaun Futeból Timor-Leste (FFTL) liuhosi treinadór Japan Tsukitate no Asistente Eduardo Pereira iha 2014 hanesan jogadór seniór U-23 iha selesaun nasionál Timor-Leste.
Bainhira, envolve iha selesaun nasionál seniór, Nataniel hamutuk ho nia kolega sira reprezenta Timor-Leste ba joga iha internasionál hanesan SEA Games dala-tolu tuituir malu no Suzuki Cup dala-rua.
Notisia relevante:
Jornalista: Hortencio Sanchez
Editór : Florencio Miranda Ximenes

