DILI, 08 marsu 2022 (TATOLI)—Vise-Ministru Administrasaun Estatál (MAE), Lino de Jesus Torrezão, informa ofisilamente iha janeiru 2002 ne’e postu administrativu Ataúro nakfilak ba munisípiu espesiál maibé Governu seidauk deside administradór sé no ida-ne’ebé mak atu lidera munisípiu Ataúro.
Notísia Relevante: Governu nomea Ataúro-oan sai administradór lidera Atáuro
“Ofisiálmente Ataúro tama ona ba iha munisípiu Ataúro iha 2022 maibé kona-ba administratór ne’ebé atu lidera munisípiu Ataúro mak Governu seidauk deside to’o ohin loron,” Vise-Ministru Administrasaun Estatál (MAE) ne’e hateten ba Agência TATOLI, iha nia knaar fatin Colmera, Dili, tersa ne’e.
To’o agora seidauk deside administradór tanba Governu sei hein atu submete kandidatu na’in-tolu (3) nia naran ba Konsellu Ministru (KM), nune’e bele halo diskusaun no hili entre na’in-tolu ne’e sai administradór.
Tanba, nia dehan, to’o agora Governu seidauk lori kandidatu na’in-tolu nia naran ba Konsellu Ministru (KM) tanba sei haree ba festa demokrásia liu-liu iha eleisaun prezidensiál 2022.
‘Bainhira eleisaun prezidensiál 2022 ramata, mak ami sei lori naran hirak ne’e ba Konsellu Ministru,” nia dehan.
Daudaun ne’e Governu halo ona levantamentu hodi konstrui edifisíu ba administradór munisipiu Ataúro, maibé iha impedimentu hosi sidadaun ne’ebé okupa hela fatin refere.
“Ami halo ona levantamentu atu konstrui edifisíu ba Munisípiu Ataúro maibé ita hasoru problema ida mak entre sidadaun ne’ebé okupa fatin ne’e. Maibé rai-na’in iha rezultadu posizitivu no entrega fatin ne’e ba Estadu atu konstrui edifisíu maibé okupante mak lakohi,” nia dehan.
Kona-ba kestaun ne’e, Governu liuhosi MAE iha posibilidade sei esforsu makaas no iha tempu besik atu bolu raí-na’in no ema ida ne’ebé okupa rai ne’e, hodi bele rezolve liuhosi diálogu ho ulun malirin.
“Ministru Administrasaun Estatál, Miguel Pereira de Carvalho fó ona autorizasaun ba ha’u atu ba Ataúro bolu sira hamutuk hodi rezolve no ita bele konstrui edifisíu refere. Maibé, ita sei kria kondisaun hodi fó fali fatin (rai) seluk ba sira hodi hela no sei fó mós indeminizasaun. Ida-ne’e mak ami esforsu atu halo, maibé laiha konkordansia entre hosi ema-ne’ebé okupa fatin ne’e,” nia dehan.
Ema-ne’ebé okupa rai ne’e, nia dehan, mesak ema veteranu no nia rasik kontaktu ona ba Prezidente Konsellu Kombatente Libertasaun Nasionál, Vidal de Jesus ‘Riak Leman’, atu fó atensaun ba veteranu sira tanba Governu hakarak halo dezenvolvimentu iha Ataúro.
“Desizaun finál ne’ebé fó aparellu ba Estadu, ba Ataúro nian mak sei tama ho dirasaun hosi Terra no Propriedade atu fó notifikasaun ba sira, nune’e sira sai hosi fatin ne’ebá. Iha alternativu tolu hanesan muda de’it sidadaun rua-ne’ebé hela ne’e ba munisípiu nia sorin, fó fali rai seluk no fó indeminizasaun ba sira.
Tuir nia, bainhira parte infraestrutura konstrui edifisíu ba administradór munisípiu Ataúro nian mak hafoin tama iha prosesu preparasaun ba rekursu umanu ka funsionáriu ne’ebé atu servisu iha Administrasaun Munisipál Ataúro.
Notísia Relevante: Hahú janeiru 2022, Ataúro sai munisípiu foun
Jornalista : Osória Marques
Editór : Cancio Ximenes
