Top

Estadu TL presiza valoriza solidaridade “misaun paz em Timór” ho ró Lusitânia  Espresso

Diretór Institutu Defeza Nasionál (IDN), Donaciano Costa Gomes "Pedro Klamar Fuik". Imajen/Egas Cristóvão

DILI, 11 marsu 2022 (TATOLI)— Xefe Estadu Maiór FALINTIL-Forsa Defeza Timor-Leste (F-FDTL), Komodoro, Donaciano Costa Gomes Pedro “Klamar Fuik”, husu ba Estadu no Governu Timor-Leste atu valoriza ba sidadaun Portugál sira ne’ebé hola inisiativa organiza ró Lusitânia  Espresso ho “misaun paz em Timor”

“Ha’u rekomenda ba iha ita nian Estadu bele hanoin oinsá mak fó rekoneisementu no onra ba sira ka fó medalla ba sira, hanesan ita nian Estadu atribui ba solidaridade internasionál sira hotu  ne’ebé kontribui ba ita-nia luta libertasaun nasionál. Nune’e sira bele rai iha sira nian memoria pesoál katak sira mós kontribui ba ita nia luta ba ukun rasik an,” Komodoro Pedro Klamar Fuik hateten ba jornalista sira iha Santa-Cruz-Dili, sesta ne’e.

Komodoro Pedro Klamar Fuik hato’o kestaun ne’e, bainhira komemora memória misaun ba pás iha Timor ho Ró Lusitânia Espresso ba tinan 30 ho nia kolega sidadaun Portugál na’in-tolu, sesta ne’e, liuhosi presta omenájen iha Semitériu Santa-Cruz Dili.

Tanba, iha loron 11 marsu 1992, sidadaun Portugál inklui ativista no jornalista-sira ho inisiativa hala’o movimentu solidaridade internasionál ho misaun pás iha Timor ne’ebé hala’o viajén ho Ró Lusitânia Espresso husi Portugál mai Timor-Leste (provínsia ba da-27 Indonezia ka Timor-Timur).

Sidadaun Portugés kuaje ema 120 kompostu hosi ativista no jornalista mai ho ró Lusitânia  atu lori misaun pás mai Timor-Leste liuliu lori ai-funan atu fó solidaridade ba timór-oan ne’ebé mate iha masakre Santa-Cruz, loron 12 novembru 1991.

Razaun sidadaun Portugés sira ne’e viájen ho ferryboat ne’e mai Timór, bainhira akompaña públikasaun masakre hosi jornalista Saudozu Max Stahl, kona-bá situasaun funu iha TL liuliu Masakre Santa-Cruz iha 12 novembru 1991.

Momentu ne’e marka iha partisipante sira nia memória. Bainhira hahú dadeer loron 11, ró ida ne’ebé hakbesik ba Lusitânia Expresso hahú komunikasaun, hodi hatete: “Ne’e Papa Kilo Alfa India. Ró funu indonéziu nian. Imi agora iha bee teritoriál sira indonéziu nian”.

Ho jornalista, estudante no individualidade sira hamutuk atus resin, inklui eis-Prezidente portugés António Ramalho Eanes, iha ró laran, ró portugés ne’e fila ba Austrália, hafoin Rui Marques desidi katak hanesan dalan úniku hodi imajen sira blokeiu hosi mariña indonéziu bele fó sai iha nível internasionál.

“Ami iha ró laran ema ativista, jornalista-sira no timór-oan ha’u mesak, ami to’o tasi klaran atu besik tasi Timór, militár Indonézia la autoriza ami atu tama no ami iha de’it ró laran hodi fila-fali ba iha Darwin-Austrália,” Xefe Estadu Forsa Armada ne’e fó lembra.

Nune’e, Ai-funan sira so’e ba tasi no liutiha tinan 29, membru balun misaun nian konsege kumpre ideia hosi inisiativu hodi fó omenajen ba vítima sira hosi masakre nian, iha Díli.

“Ha’u honoin akontesimentu masakre Santa-Cruz ne’e, intesifika apoia solidaridade internasionál, hodi ajuda oinsa bele solusiona problema Timór ho lalais no ho tulun sira ne’e, ohin ita to’o hetan ita nian independensia,” Xefe Estadu Maiór Jenerál Forsa Armada ne’e haktuir.

Iha fatin biban hanesan, António Sampaio dehan nuudar jornalista ne’ebé akompaña direta ró Lusitânia Espresso atu halo Misaun Pás iha Timor hodi solidarida ba joven sira ne’ebé mate iha masakre Santa Cruz 12 novembru 1991.

“Ha’u haree no rekoñese momentu ne’e situsaun Timór difisil tebes tanba presegisaun ne’ebé Militár Indonézia halo ba Timor iha momentu ne’e ba. Ami iha momentu ne’e militár indonézia la autoriza tama mai Timór ho ró Lusitânia, ami kuase ema nain 120 iha de’it ró laran, ha’u konsege hakarek tiha notisia kona-ba situsaun timór nian no kona-ba situsaun ró Lusitânia  rasik,” nia afirma.

Jornalista: Natalino Costa 

Editór      : Florencio Miranda Ximenes

Publisidade

Leave a Reply

Latest Post

error: Content is protected !!