OÉ-CUSSE, 11 marsu 2022 (TATOLI)—Kandidatu Prezidente Repúblika períodu 2022-2027 ho númeru sorteiru 16, Mariano Assanami Sabino Lopes, sesta ne’e realiza atividade kampaña iha Palaban, sub-rejiaun Pante Macassar, Rejiaun Administrativu Espesiál Oé-Cusse Ambeno (RAEOA).
Assanami hato’o nia kompromisu eleitorál katak bainhira hetan fiar hosi povu sai Xefe Estadu mak sei defende polítika Estadu kontinua promove liuhosi koordenasaun ko’alia ho parte ezekutivu haree hodi dezenvolve Oé-Cusse nu’udar rejiaun espesiál ba Zona Espesiál Ekonomia Sosiál no Merkadu Timor-Leste (ZEESM-TL).
Se eleitu sai Prezidente Repúblika, nia promote bainhira eleitu sei loké palásiu ba povu hodi bele hato’o aspirasaun saida de’it nune’e koordena ho ezekutivu tau atensaun.
“Saida mak espesiál iha ZEESM-TL RAEOA ne’ebé seidauk ramata oinsá mak ita-nia mehi indústria zona ekonomia foun ida-ne’ebé mak atu ba merkadu boot hodi loké odamatan ba Indonézia. ZEESM-TL nia mehi sei naruk atu sai odamatan ekonomia tama iha Indonézia ne’e seidauk to’o bainhira, nune’e Prezidente Repúblika mak responsável polítika jerál Estadu no sei ko’alia ho ezekutivu,” Assanami hateten perante ba apoiante iha kampaña.
Assanami sei kria mós konsellu aman ba nasaun ne’ebé sei hola parte hosi lidér nasionál hotu no bispu hosi dióseze tolu ho nia knar atu fó Konsellu ka kurize Xefe Estadu.
Prezidente Repúblika kumpre de’it konstituisaun no garante ba instituisaun demokrátiku sira hodi funsiona tuir konstituisaun.
Tempu ona Timor-Leste tenke dignu, nune’e sei koordena ho Governu dezenvolve ekonómia, estrada, bee-moos, orienta ba moris di’ak povu nian no fó importánsia investe iha ema no sosiedade foun liu hosi polítika hadi’a setór edukasaun, saúde hodi prepara rekursu umanu ne’ebé di’ak ba nasaun ho kompetetivu.
Iha parte seluk, nia dehan, nia parte labele haree funsionáriu públiku tuir kór partidu no lakohi Tribunál iha julgamentu haree tuir kór.
Xefe Estadu sai KomandanteSsupremu forsa armada mak fó atensaun hodi dezenvolve instituisaun militár sai forte no profisionál liután domina teknolójia hodi bele kontrola tasi, fronteira terrestre no áero, no servisu hamutuk ho militár rejiaun oioin no internasionál atu hola parte iha manutensaun pás iha Nasaun Unida (ONU, siglá portugés).
Nia sei fó atensaun rejime salariál hasa’e ba menbru F-FDTL no PNTL, no sei ko’alia no diskute ho Governu promove polítika hasa’e saláriu báziku.
Iha relasaun internasionál sei kria kooperasaun ho nasaun sira seluk hodi lori investidór internasionál mai investe iha rai laran hodi loké kampu traballu ba timor-oan sira.
Kampaña la’o di’ak
Diretór Komisaun Nasionál Eleisaun (CNE, siglá portugés) Rejiaun Administrativu Espesiál Oé-Cusse Ambeno (Raeoa), Tomás Oqui Meta, hateten monitorizasaun ba kampaña Kandidatu Prezidente Repúblika períodu 2022-2027 ho númeru sorteiru 16, Mariano Assanami Sabino Lopes, iha Oé-Cusse ho situasaun la’o di’ak ka hakmatek.
“Kampaña kandidatu númeru sorteiru 16 to’o hotu la’o di’ak tuir lei ne’ebé iha,” Diretór CNE ne’e hateten ba Tatoli hafoin halo monitorizasaun ba kampaña.
Kandidatu kumpre oráriu kampaña ne’ebé fó sai hosi órgaun eleitorál mezmu hahú tarde, ne’ebé aprezenta mós kompromisu eleitorál no vizaun ho misaun Prezidente Repúblika ne’ebé mensajen sira kria pás ho estabilidade no fasilita apoiante sira hodi rona programa.
Nia husu atu kandidatu kontinua nafatin kumpre prosedimentu kampaña no promove pás iha kampaña tuir mai.
Maske lei bandu labarik sira tuir kampaña, maibé realidade hatudu katak labarik sira sei tuir kampaña eleitorál ne’e, tanba karik la’os orgabiza hosi ekipa kampaña maibé dalaruma sira haree ema boot sira halibur hamutuk hodi dada sira hakarak atu haree kampaña refere.
Entertantu kampaña ne’e hala’o hahú iha tuku 16h35 no termina iha tuku 18h00, ne’ebé superviziona hosi Komisaun Nasionál Eleisaun (CNE, siglá portugés), Uniaun Europeia, Provedória Direitu Umanu no Justisa (PDHJ) no hetan seguransa másimu hosi Polísia Nasionál Timor-Leste (PNTL).
Jornalista : Nelson de Sousa
Editór : Cancio Ximenes
