VIQUEQUE, 12 marsu 2022 (TATOLI)–Diretór Servisu Sekretariadu Administrasaun Tékniku Eleitorál (STAE) munisípiu Viqueque, Humberto da Costa, informa, parte nasionál distribui ona materiál sensitivu Eleisaun Prezidensiál ba parte munisipál.
“Ami horiseik (sesta) lorokraik, lori ona materiál sensitivu ba munisípiu Viqueque no oras ne’e daudaun Komandu Polísia Nasionál Timor-Leste (PNTL) hahú horikalan koloka ona membru sira hodi hein materiál hirak ne’e iha salaun administrasaun, hodi fó seguransa durante 24 oras,” Diretór STAE Viqueque informa ba Agência TATOLI, iha ninia knaar fatin, sábadu ne’e.
Notísia relevante: STAE Viqueque identifika sentru votasaun 92
Munisípiu Viqueque simu kaixa hamutuk 23, ne’ebé iha livru buletin votu hamutuk 1.321 no folla hamutuk 66.500.
“Ami prepara ona karta ba Komisaun Nasionál Eleisaun (CNE, sigla portugés) no reprezenta kandidatu sira iha munisípiu Viqueque, nune’e loron 14 to’o 17 marsu, STAE bele loke buletin votu ho pakote, ho prezensa hosi reprezentante kandidatu sira hodi halo transpáransia,” nia hato’o.
Nune’e, sei halo seremónia distribuisaun materiál sensitivu ba sentru votasaun iha loron 18 marsu oras serbisu no loron eleisaun iha 19 marsu.
“Distribuisaun materiál sensitivu ba eleisaun sei akompaña hosi PNTL, ne’ebé sei fó seguransa másimu tanba hanesan sasán sensitivu,” Diretór STAE Viqueque dehan.
Aleinde ne’e, parte PNTL sei akompaña prosesu apuramentu iha munisípiu Viqueque to’o tama ba apuramentu nasionál.
Tuir dadus, númeru eleitór Eleisaun Prezidensiál 2022 iha munisípiu Viqueque hamutuk 58.421, kompostu hosi mane 29.675 reprezenta 51% no feto 28.746 reprezenta 49%.
Munisípiu Viqueque estabelese ona sentru votasaun hamutuk 92 no estasaun votu 110 iha postu lima.
Jornalista : Vitorino Lopes da Costa
Editora : Julia Chatarina
