LIQUIÇA, 14 marsu 2022 (TATOLI) – Kandidatu Prezidente Repúblika períodu 2022-2027 ho númeru sorteiu 14, José Manuel Ramos Horta, segunda ne’e hala’o kampaña eleitorál dala-12 ho tipu aberta iha Munisípiu Liquiça.
Durante kampaña, kandidatu PR hosi Partidu Congresu Nacionál Rekonstrusaun Timorense (CNRT), hateten bainhira eleitu nuudar Prezidente sei tane Governu no servisu hamutuk ho sosiedade sivil hodi hadia ekonomia nasaun no povu tuir konstituisaun.
“Iha ha’u nia mandatu karik eleitu ba Prezidente tenke kumpre no respeita konstituisaun aplika no promulga lei hirak ne’ebé tuir konstituisaun ajuda tane Governu hamutuk ho Sosiedade Sivil atu haklean dame iha rai ida ne’e atu hadia ekonomia ba povu no nasaun,” Kanidatu PR ne’e hateten iha kampu futeból Liquiça.
Notísia relevante: Horta promete haforsa investimentu diplomátika
Horta mós promote durante nia mandatu iha tinan lima sei dinamiza ekonomia atu bele iha investimentu nasioál ne’ebé kria rasik hosi Estadu. Tanba daudaun ne’e Estadu mak investedór boot iha rai ida ne’e liuhosi Orsamentu Jeral Estadu (OJE).
Timor – Leste seidauk explora didi’ak iha investimentu nasionál no privadu, kolabora di’ak ho setor privadu atu dudu ekonomia ba oin, nune’e depende nafatin ba fundu petrolíferu.
“Investidór Privadu mak hanesan sira ne’ebé kuda modo, prodús kafe, ita tenke simu kontratu hosi Estadu tanba sira mak prodús rikeza, oinsa estadu bele mobiliza rekursu atu fó apoia direta ba setór privadu bele liu hosi sistema bankaria tenke hosi banku ita nian BNCTL atu sira empresta osan ho funan kiik atu agrikultura bele ba oin,” nia relata.
Iha nia mandatu, Kandidatu Horta afirma sei hakuak setor privadu hirak ne’ebé halo ona otél boboot iha Timor-Leste tanba obra barak ne’ebé timór-oan sira halo ho kriatividade restaurante ne’ebé importante ba setór turizmu atu hatama reseita ba Estadu.
Iha biban hanesan, Mateus dos Santos hanesan apoiante ba kandidatura Ramos Horta ne’ebé partisipa iha kampaña ne’e hateten, 100% fó apoiu ba kandidatu ne’ebé apoia hosi Xanana Gusmão.
“Ha’u harga mati, apoia avo Ramos hanesan povu ida ha’u haree só avo Ramos mak di’ak ba ha’u no bele lori nasaun ne’e ba oin ne’e mak ha’u hili nia,” nia dehan.
Kampaña la’o iha pás no estabilidade
Entretantu, Observadór CNE, Julio de Carvalho relata, afirma durante oras balun nia laran halo observasaun iha ámbitu kampaña la’o ho di’ak no laiha violasaun ruma mak kandidatu ho nia ekipa halo.
“Observasaun ami nian haree kampaña Ramos Horta nian ne’e la’o ho normál ho situasaun ne’ebé hakmatek no la hamosu ireegularidade, tanba ita haree sira nia kampaña hahú 14:00 to’o 18:00 mak hotu,” nia akresenta.
Iha ámbitu kampaña ne’e halo iha situasaun hakmate no pás tanba hetan seguransa másimu hosi Polísia Nasionál Timor-Leste (PNTL) munisípiu Liquiça, observa direita hosi ekipa Prokuradó Direitu Humanus no Justisa (PDHJ), Komisaun Nasionál Eleisaun (CNE-sigla Portugés) no Observadór internasionál.
Notísia relevante: Dirijente CNRT husu apoiante kandidatu PR Horta mantein dixiplina iha kampaña
Jornalista: Hortencio Sanchez
Editór : Florencio Miranda Ximenes
