DILI, 16 marsu 2022 (TATOLI)—Governu liuhosi reuniaun Konsellu Ministru (KM) aprova ona Projetu Dekretu-Lei, ne’ebé aprezenta hosi Primeiru-Ministru, Taur Matan Ruak, ba alterasaun dahuluk Dekretu-Lei númeru 26/2021, loron 26 novembru, kona-ba medida esesionál no temporáriu sira ba vijilánsia sanitária hodi hatán ba pandemia COVID-19.
“Ho alterasaun ne’e, atu tama mai territóriu nasionál tenke sujeita ba aprezentasaun sertifikadu vasinasaun kompletu ka halo kuarentena. Laiha ona limitasaun oráriu funsionamentu ba postu fronteira terrestre sira, hodi retorna ba ninia funsionamentu diáriu normál,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu, iha Palásiu Governu, kuarta ne’e.
Notísia relevante: PR promulga dekretu PN kona-ba renovasaun ba medida esesionál-temporária
Ho alterasaun ne’e, fronteira sira terrestre funsiona normál hotu ona, no la impoin ona loron espesiál sira.
“Alterasaun ne’e sei ejize de’it komprovativu vasina ba ema hirak ne’ebé hakarak mai Timor-Leste, entaun karik ema ruma atu mai hosi rai-li’ur la presiza ona halo teste filafali, hafoin oras 48 entrada, maibé presiza de’it komprovativu katak ema ne’e vasina dala-rua (kompleta), bainhira iha booster di’ak liután, nune’e ema ne’e bainhira to’o iha ne’e nia livre bá-mai hanesan baibain,” nia akrsenta.
Portavóz Governu ne’e konsidera, alterasaun rua ne’e hanesan alterasaun boot ka prinsipál ba dekretu-lei ne’e rasik, tanba introdús hosi aprovasaun ne’ebé Parlamentu Nasionál halo ba medida esesionál semana hirak liubá, hodi evita extende tan loron 120, atu nune’e la presiza iha tan ona Estadu Emerjénsia.
Jornalista : Antónia Gusmão
Editora : Julia Chatarina
