iklan

BAUCAU, HEADLINE, IMAJEN, MUNISÍPIU, SEGURANSA

Ezekuta mandadu tribunál, PNTL detein ema na’in-tolu ba kazu Darsula

Ezekuta mandadu tribunál, PNTL detein ema na’in-tolu ba kazu Darsula

Komandante PNTL Munisípiu Baucau, Superintendente António de Sá. Imajen Tatoli/Natalino Belo.

BAUCAU, 16 marsu 2022 (TATOLI) – Komandu Polísia Nasionál Timor-Leste (PNTL) Munisípiu Baucau ezekuta ona mandadu hosi tribunál hodi detein ema na’in-tolu ne’ebé deskonfia oho João Ornai Ximenes, iha ha aldeia Darsula, suku Gariuai postu administrativu Baucau Vila.

Komandante PNTL Baucau, Superintendente António de Sá, esplika, inísiu bainhira kaptura autór na’in-tolu iha fora fragante delitu tanba PNTL hakarak evita konflitu nune’e asegura durante oras 12 iha área kurridór komandu nian hodi hein mandadu hosi tribunál.

“Horisehik mandadu (kaptura) fó-sai ona entaun ita halo detensaun ba sira na’in-tolu no agora iha hela sela polísia hodi hein submete ba tribunál atu hahú interrogratóriu dahuluk,” Komandante PNTL Baucau hateten iha Vila Nova, kuarta ne’e.

Tribunál fó-sai mandadu detensaun iha loron tersa (15/03) ne’ebé rejista ho númeru NUC 0015/22.BCSTC hodi haruka PNTL detein suspeitu sira dentru oras 72 laran nu’udar suspeitu ne’ebé sei investiga tanba halo krime omisídiu simples no intergridade fízika simples ne’ebé prevista iha kódigu penál artigu 138 no 145.

Arguidu sira deskonfia oho João Ornai Ximenes iha loron sábadu (12/03) purvolta oras 14:00, bainhira mosu asalta derrepente hosi membru grupu arte-marsiál uza atributu partidu ne’ebé deskonfia organizadu antes hahú kampaña kandidatura Prezidente Repúblika númeru sorteiu 6, Francisco Guterres ‘Lú Olo’ iha aldeia Darsula, suku Gariuai postu administrativu Baucau Vila.

Vitíma João Ornai Ximenes idade 21 hakotu iss iha fatin akontesementu tanba hetan pankada no parte PNTL liuhosi SIK transporta kedas mate-isin ba Hospital Nasionál Guido Valadares (HNGV) Dili hodi submete ba prosesu autópsia.

Notísia relevante: TDB adia prosesu interrogatóriu dahuluk ba kazu Darsula

Jornalista    : Natalino Belo

Editór           : Evaristo Soares Martins 

iklan
iklan

Leave a Reply

iklan
error: Content is protected !!