iklan

NASIONÁL, DILI, ELEISAUN, HEADLINE, POLÍTIKA

Kandidata PR Ângela Freitas: “Ha’u mai atu serbí la’ós atu hanai”

Kandidata PR Ângela Freitas: “Ha’u mai atu serbí la’ós atu hanai”

Porta Voz da Resistencia Nacional Defende Justica no CRDTL, Angela Freitas. Imajen/Egas Cristovão

DILI, 16 marsu 2022 (TATOLI)–Maria Ângela Freitas, nu’udar kandidata independente ho númeru sorteiu tolu (3) deside kompete iha eleisaun prezidensiál ho objetivu atu serbí povu Timor-Leste tanba povu mak Estadu no Estadu mak povu.

Maria Ângela Freitas da Silva mai ho lema “Hamutuk salva Nasaun antes ke tarde”.  Nia deside kandidata an ba Prezidente Repúblika períodu 2022-2027 ho misaun serbisu hamutuk kaer-metin soberania no reunifika unidade nasionál ho dignidade no prosperiedade.

Kandidata númeru sorteiu tolu (3) ho vizaun atu hametin soberania no identidade nasaun ne’ebé forte, realiza no hametin ekonomia nasionál, realiza estadu ne’ebé forte, efetivu no hadi’a ekonomia povu ein-jerál.

“Ha’u mai atu serbi la’ós atu hanai. Ha’u mai serbí povu sein simu saláriu. Ha’u mai la’ós buka osan ka simu pensaun vitalísia,” Ângela Freitas koa’lia asuntu ne’e bainhira intervista eskluziva ho Agência TATOLI, iha Arkivu Muzeu no Rezisténsia Timorense (AMRT).

Bainhira fó fiar eleita nu’udar Prezidente Repúblika sei halo komunikasaun ativu ho órgaun soberanu sira hanesan Parlamentu Nasionál, Governu no Tribunál Rekursu nune’e hasai povu hosi kiak no mukit.

“Komunikasaun ne’e importante nune’e propoin ba Governu no Parlamentu Nasionál koloka orsamentu ne’ebé sufisiente ba setór agrikultura nune’e agrikultór prodús ho kuantidade ne’ebé boot hodi Esporta ba rai-li’ur, tanbasá labele, ita bele. Até liis de’it mós ita importa hosi Índia, foos ita importa hosi Vietname. Ha’u hanoin ita tenke kria polítika hodi hapara ona polítika esportasaun,” nia katak.

Nia dehan, Governu tenke buka hatene atu deskobre tanbasá mak joven barak lakohi sai agrikultór, entaun solusaun mak tenke kapitaliza iha banku nasionál (BNCTL) nune’e motiva agrikultór sira halo produsaun ho kuantidade boot.

“Durante ne’e ita-nia agrikultór sira hasoru hela problema boot, entaun dalan mak tenke ba rai-li’ur sai nu’udar traballadór. Buat sira-ne’e la la’o tanba ita laiha kréditu ba agrikultór sira,” nia akresenta.

Biografia

Maria Ângela Freitas da Silva, moris iha Bahu, Baucau, iha loron 10 Novembru 1969. Maria Ângela nu’udar medika no polítiku, no nu’udar mós Líder Partidu Trabalhista iha Timor-Leste.

Bainhira sei estudante, Ángela Freitas hetan torturasaun hosi ezérsitu indonésiu durante okupasaun indonézia iha Timor-Leste. Iha 1988, nia serbisu iha Institutu Direitu Humanu iha Indonézia, nune’e mós serbisu ba Amnestia Internasionál iha tinan 1989 nu’udar sekretária direitu umanu.

Iha dékada 1990, nia halai (fugiu) ba Austrália, hodi kontinua nia estudu iha Universidade Queensland. Hafoin termina estudu ne’e iha siénsia polítika no medisina, nune’e komesa serbisu iha ospitál iha Brisbane, inklui mós serbisu destakamentu iha Mariña Australiana nian. Iha momentu ne’ebá nia serbisu iha bordu ró patrulla ne’ebé tau matan ba refujiadu sira.

Hafoin okupasaun ilegál indonézia iha 1999, nia fila mai Timor Leste hodi lidera Partidu Trabalhista Timorense. Partidu ne’e funda iha 1974 hosi nia aman Paulo Freitas.

Iha 2001, nia tama prizaun maskulina ho nia oan mane iha Austrália, tanba akuzada ba asasinatu hasoru australianu ida. Hafoin semana rua iha prizaun, nia libertada sein akuzasaun, tanba vítima nunka enkontrada ka nunka hetan.

Angela Freitas tenta konkorre eleisaun prezidensiál iha 2012, maibé ninia kandidatura rejeitada hosi Prezidente Supremu Tribunál tanba la prienxe rekizitu ne’ebé prevista iha Lei Eleitorál ba Prezidente Repúblika.

Nune’e iha eleisaun prezidensiál 2017, Angela Freitas kontinua konkorre iha eleisaun ne’e termina ho sétimu lugár iha votasaun eleisaun prezidensiál, ho totál votu 4.353, ekivalente ka korresponde ho partisipasaun eleitór 0,84%. Iha eleisaun prezideniál 2022 nia kontinua kandidata-aan.

Jornalista : Evaristo Soares Martins

Editór       : Cancio Ximenes

iklan
iklan

Leave a Reply

iklan
error: Content is protected !!