PM Taur apela ba povu Timor-Leste partisipa eleisaun prezidensiál 2022

DILI, 17 marsu 2022 (TATOLI)—Primeiru Ministru (PM), Taur Matan Ruak, apela ba Povu Timor-Leste tomak atu kria pás no sidadaun sira ho idade 17 ba leten atu partisipa másima iha eleisaun prezidensiál 2022 ne’ebé sei hala’o iha loron 19 marsu 2022.
“Ha’u-nia mensajen iha rua mak ba populasaun kontribui ba estabilidade no seguransa no eleisaun prezidensiál bele la’o di’ak no aumenta taxa partisipasaun ita-nian, tanba rua ne’e ajuda makaas no reflete iha avaliasaun dezemnpeñu demokrátiku nasaun ida-nian,” Xefe Governu ne’e hateten ba jornalista sira hafoin remata sorumutu ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, kinta ne’e.
Se sidadaun sira-nia kontribuisaun no partisipasaun di’ak fó previlejiu boot ba iha rai doben Timor-Leste, tanba ne’e nia husu aumenta taxa partisipasaun no sidadaun hotu ne’ebé bele halo esforsu vota no hili kandidatu sira-ne’ebé kandidata an ba Prezidente Repúblika períodu 2022-2027.
PM Taur Matan Ruak sente kontente ba kampaña eleitorál ne’ebé hahú hala’o iha loron 02 marsu no termina ona iha loron 16 marsu ho situasaun hakmatek no seguru.
“Ha’u kontente loos bainhira halo akompaña, hanesan Ministru Interiór ba kampaña tomak iha insidente ki’ik-oan maibé jerál la’o di’ak loos,” nia dehan.
Durante sorutumu PM relata ba Xefe Estadu iha asuntu rua mak kona-ba halo avaliasaun ba atividade kampaña eleisaun prezidensiál no mós preparativu ba oin iha eleisaun la’o di’ak ho mós kona-ba situasaun COVID-19.
“Ha’u informa ba Prezidente Repúblika katak ita deside normaliza no fleksiviliza medida sira loké fali fronteira no kondisaun ne’ebé ezije mak kartaun vasinasaun de’it,” nia hateten.
Nia informa, Xefe Estadu apoiu desizaun Governu nian ne’e no alerta nafatin kumpre regra sira no dekretu-lei ne’ebé Governu prepara sei haruka ba Prezidente Repúblika bele analiza hodi fó hanoin.
Jornalista : Nelson de Sousa
Editór : Cancio Ximenes

