DILI, 18 marsu 2022 (TATOLI)–Xefe suku Lahane Orientál, postu administrativu Na’in-Feto, munisípiu Dili, Trindade Batista, informa, tinan ne’e estabelese sentru votasaun lima ba votante 13.966 ba suku ne’e atu ezerse direitu iha Eleisaun Prezidensiál 2022.
Sentru votasaun estabelesidu daudaun ne’e iha ona preparasaun di’ak atu realiza eleisaun iha loron 19 marsu 2022, hanesan edifísiu Eskola Ensinu Pré-Eskolár Bee-koe, edifísiu Eskola Ensinu Pré-Eskolár Ai-turi laran, sede suku Lahane Orientál, Sentru Juveníl, no Eskola Ensinu Báziku Amigu de Jesus.
“Sentru votasaun ida iha ninia estasaun votu balun haat no balun lima, ha’u seidauk hatene detallu totál estasaun votu sira ne’e, maibé aban maka ita bele halo liután identifikasaun,” Xefe suku Lahane Orientál hateten ba Agência TATOLI, iha ninia knaar fatin, sede duku, sesta ne’e.
Notísia relevante: Ohin, STAE distribui materiál eleisaun ba sentru votasaun 1.200 iha territóriu nasionál
Tuir Autoridade suku ne’e, dadus ne’ebé rejista iha Sekretariadu Tékniku Administrasaun Eleitorál (STAE) iha 13.966, maibé falta abitante barak mak seidauk tama iha lista.
“Bainhira rejista hotu bele sa’e to’o 16.000, maibé la signifika sira ne’e mak votante ne’ebé aban atu vota. Ida-ne’e dadus populasaun suku Lahane orientál nian, agora dadus ne’ebé atu ba vota, STAE sei haruka tuir mai,” nia tenik.
Xefe suku no xefe aldeia sira kontinua kolabora no koopera nafatin ho STAE no Komisaun Nasionál Eleisaun (CNE, sigla portugés) atu tulun Brigada no Polling Staff sira ne’ebé destaka iha sentru votasaun lima bele lori susesu ba Eleisaun Prezidensiál iha suku Lahane Oriental ne’e.
“Fiar katak ho Autoridade komunitária sira-nia tulun, buat hotu sei la’o di’ak,” nia akresenta.
Tuir dadus hosi STAE, to’o loron 08 novembru 2021 eleitór ne’ebé resensiadu no atualizadu foun no tuan iha baze dadus akumula 855.597, kompostu hosi diáspora 6.538 no rai-laran 849.059.
Iha eleisaun, STAE identifika sentru votasaun hamutuk 1.200 no estasaun votu iha 1.500 iha territóriu tomak.
Jornalista : Tomé Amado
Editora : Julia Chatarina
