DILI, 19 marsu 2022 (TATOLI)—Kandidadu Prezidente Repúblika ba períodu 2022-2027 ho númeru sorteiu 16, Mariano Assanami Sabino Lopes, hateten atu manan ka lakon ne’e nia entrega ba povu mak deside iha eleisaun prezidensiál 2022.
“Ohin, ita entrega povu deside buat ida-ne’ebé ami atu halo ko’alia tiha ona iha fatin hotu hodi hato’o mensajen inan-aman ho joven sira, tan ne’e apresia tebes saida mak desizaun povu nian, Ita labele deklara uluk saida mak desizaun povu nian no laiha kandidatu ida mak hatene ona katak nia manan ne’e la loos. Se nia halo buat ruma iha kotuk mak garante nia manan ona, ne’ebé ita entrega ba povu mak hili,” Asanami hato’o lia hirak ne’e ba jornalista sira hafoin ezerse votu iha sentru votasaun eskola primária iha Aldeia Transporte Aero de Timor Bairru Pite, suku Bairru Pite, postu administrativu Don Aleixo, munisípiu Dili, sábadu ne’e.
Tanba ne’e, nia dehan, atu manan ka lakon rezultadu saida de’it ne’e direitu povu nian ezerje ho demokrátiku fundamentu povu nian, nune’e parte hotu tenke respeita.
Nia agradese ba maromak no erói hotu tanba buat la’o di’ak iha eleisaun no ema hotu hein de’it respeitu ba povu ida-idak ezerse nia direitu demokrátika ba vota, tan ne’e sé de’it mak povu fó komfiansa nia mak Prezidente Repúblika ne’ebé lori povu hotu nia lian.
“Kandidatu sé de’it mak eleitu sai Prezidente Repúblika, ba ema tomak halakon diskriminasaun labele kór polítika tanba Xefe Estadu mak garante indepedente nasionál. Katak, garante sidadaun nia direitu atu moris livre ho hakmatek. Povu nia votu mak transforma ba ukun hodi lori dezenvolvimentu nasaun ba oin,” nia dehan.
Iha prosesu festa demokrásia ne’e povu ezerse sira-nia direitu votu ba tinan lima dala ida, katak Prezidente Repúblika eleitu atu bele garante no lori dezenvolvimentu nasaun ba oin.
Eleisaun ne’e hetan observaaun hosi observadór nasionál, internasionál, fiskál hosi kandidatu sira, brigadista, ofisiál eleitorál hosi Sekretariadu Tékniku Administrasaun Eleitorál (STAE), Komisaun Nasionál Eleisaun (CNE, sigla portugés) no hetan seguransa másimu hosi Polísia Nasionál Timor-Leste (PNTL).
Jornalista : Nelson de Sousa
Editór : Cancio Ximenes
