iklan

NASIONÁL, DILI, ELEISAUN, HEADLINE, POLÍTIKA

Kontente ho demokrasía TL, Rogério fiar bele hetan votus balun  

Kontente ho demokrasía TL, Rogério fiar bele hetan votus balun   

Kandidatu Prezidente Repúblika període 2022-2027, Rogério Lobato, vota iha sentru votasaun Eskola No 5 Comoro, sabadu (19/03). Imajen Tatoli/Francisco Sony

DILI, 19 marsu 2022 (TATOLI)– Kandidatura Prezidente Repúblika, Rogério Lobato, ho númeru sorteiu haat (04) kontente ho demokrasía ne’ebé  iha Timor-Leste (TL) no fiar bele hetan votus balun iha Eleisaun Prezidénsial períodu 2022-2027.

“Ha’u mai halo ezerxisiu ida hanesan sidadaun TL. Naturalmente ha’u bele konta ona ho votu ida ha’u nian no ha’u kontente hare’e demokrasia iha TL ne’ebé funsiona ho kandidatu ida barak tebes iha TL ne’ebé ema rihun barak tebes mak partisipa. Ida ne’e hatudu katak ita nia demokrasía ne’e forte,” hatete Kandidatura PR ne’e ba jornalista dader ne’e iha Sentru Votasaun Ensinu Basíco Filial No. 5 Comoro, Dili, sabadu ne’e.

Iha biban ne’e, Rogério Lobato aproveita oportunidade ne’e fo parabéns ba kandidatu hotu, tanba durante kampaña ne’e buat hotu la’o ho diak, naturalmente iha krítika balun mais ne’e iha demokrásia normal.

“Ha’u sente katak depois eleisaun ita hotu hanesan sidadaun TL nian bele hamutuk hateke ba oin no hadia rai ida ne’e,” Nia dehan.

Rogério Lobato espera katak sei hetan votus balun, hanesan kandidatu sempre dehan hakarak manán hodi serbí rai ida ne’e maibé depende ba vontade no dezisaun povu nia.

“Se’e deit mak manán, ha’u dehan katak laiha  ida mak lakon maibé Timor nia demokrásia mak manán. Ha’u sente katak sei hetan votus balun, Ha’u labele garante katak ha’u bele hetan vitória,” Rogério deklara.

Nia sente katak, partisipa sai kandidatura ba Eleisaun Presidensial ne’e hodi halo debate ideias, para timoroan hotu tau hamutuk sira nia hanoin oinsa halo rai ida ne’e ba oin. Ne’e mak  importante.

Kandidatura ne’e rekomenda povu tenke vota ho hakmatek, iha estabilidade ho paz, tanba ema hotu partisipa iha prosesu ida ne’e atu hadia Timor ba moris ne’ebé di’ak.

“Se’e deit mak manán desde   prosesu ne’e la’o ho transparansia no klareza, ha’u laiha difikuldade atu rekoñese. Ha’u la’os atu sobu Timor,” kandidatura ne’e esplika.

Iha fatin hanesan, Mario da Costa Cardoso husi Suku Comoro, Aldeia Moris Foun hafoin ezerse nia direitu hanesan sidadadun TL husu atu future Prezidente ne’ebe eleitu tenke iha kapasidade atu hadia nasaun no  halo ligasaun ho parte estranjeiru atu halo investimentu iha rai laran no loke kampu servisu ba ema hotu.

“Povu ne’e la presiza dehan atu fo osan, importante mak elestrisidade, estrada diak no be’e mos. Futuru Prezidente Repúblika ne’ebé mak eleitu   importante mak iha kapasidade intelektualidade atu hadi’a nasaun ida ne’e,” dehan Mario da Costa Cardoso.

Nune’e mós, Votante husi Suku Comoro Aldeia Metin Haat, Antonia da Costa espresa nia ideia katak hili Prezidente ne’e atu bele hetan hakmatek,    bele buka moris no ajuda oan sira ba futuru aban bainrua.

“Ami se’e deit mak ukun mos la buat ida, importante mak ita bele moris hakmatek no bele buka moris ba oin nian no ba oan sira nia futuru mai,” votante ne’e dehan.

Observasaun husi Tatoli iha terrenu nota katak prosesu votasaun iha Sentru Votasaun refere la’o ho diak no hetan seguransa maximu husi Polisía Nasíonal Timor-Leste (TL).

Sekretariadu Tékniku Administrasaun Eleitorál (STAE) rejista total 852.500 eleitór  iha territóriu nasionál  no diaspora 7.113.

Total 852.500 eleitór  iha territóriu nasionál  ne’e mak husi munisípiu Dili iha eleitór 190.710,  Aileu (33.603), Ainaro (45.833),  Baucau (96.207), Bobonaro (70.283), Covalima (47.807),  Ermera (82.714), Lautém  (48.012), Liquiça (50.987), Manatuto (35.603), Manufahi (40.825), Viqueque  (58.421) no RAEOA iha eleitór 51,495.

Eleitór  iha  territóriu diaspora ho total 7.113 mak husi  Australia ho total eleitór  1.487, Koreia do Sul  (1.277), Englaterra (2.229), Irlandia do Norte (1.264) no 856 eleitór rejista iha Portugal.

Jornalista  : Cidalia Fàtima

Editorá      : Armandina Moniz

 

 

iklan
iklan

Leave a Reply

iklan
error: Content is protected !!