Virgílio Guterres prontu simu rezultadu eleisaun

DILI, 19 Marsu 2022 (TATOLI)— Kandidatu Prezidente Repúblika (PR) independente ba períodu 2022-2027, ho númeru sorteiu 12, Virgílio da Silva Guterres, hateten nia parte prontu simu rezultadu Eleisaun Prezidensiál tanba desizaun ne’e determina direta hosi povu.
Kandidatu Independente ne’e to’o iha sentru votasaun iha 9:15 dader ne’e, hodi ezerse nia direitu votu iha sentru votasaun sede Suku Bairru Formoza, munisípiu Dili.
Virgílio dehan, votasaun ne’e la’ós atu ko’alia manán ka lakon, maibé ne’e prosesu demokrátiku ba ema atu ezerse sira nian direitu.
“Ha’u iha hanoin katak eleisaun ne’e la’ós mánan ka lakon, ne’e hanesan prosesu polítiku ida ne’ebé que sai hanesan formasaun polítiku ba ita nian sidadaun,” Kandidatu PR ne’e hateten hafoin ramata vota, iha sentru votasaun.
Nune’e, Vírgilio Guterres sente kontente tebes tanba iha tinan ne’e partisipa mós festa demokrásia ne’e nu’udar kandidatu.
“Ha’u sente orgullu tanba tinan- tinan ha’u hili ema seluk, maibé tinan ne’e ha’u hili ha’u nia aan,” Vírgilio kontente.
Kandidatu ne’e apresia tebes ba prosesu demokratisasaun iha Timor-Leste no orgullu ba populasaun sira hotu ne’ebé ho vontade tomak partisipa eleisaun.
“Ha’u orgullu tanba tinan ne’e marka diferente tebes tanba iha eleisaun Prezidensiál tinan ne’e kandidatu nain-16, maibé povu maduru ona iha prosesu demokratisaun ida ne’e. Ha’u espera eleisaun Prezidensiál tinan ne’e bele la’o diak,” nia kongratulla.
Notísia relevante: Don Vírgilio husu kandidatu PR na’in-16 tenke simu rezultadu
Jornalista: Natalino Costa
Editór : Florencio Miranda Ximenes

