PNTL detein suspeitu na’in-21 ba kazu atake sentru votasaun Fomentu II

DILI, 20 marsu 2022 (TATOLI)— Polisia Nasionál Timor-Leste (PNTL) munisípiu Dili, detein ona suspeitu na’in-21 ne’ebé deskonfia envolve kazu atake sentru votasaun durante kontajen votu iha Eskola Bazika Fomentu II, iha sábadu (19/3).
“Lolos duni katak iha insidente ida akontese iha sentru votasaun Eskola Bazika Fomentu II, maizumenus tuku 16:00, sábadu ne’e, bainhira fiskál sira halo hela kontajen votu, iha grupu balun halo atake tanba la simu rezultadu kontajen votu, nune’e hahú halo impedimentu hodi halo asaltu ba iha fiskál no mós ofisiál órgaun eleitorál sira,” Komandante PNTL Munisípiu Dili, Superintendente Xefe Henrique da Costa, hateten ba Agência TATOLI, via telefónika, domingu ne’e.
Iha atake ne’e vidru eskola balun rahun no ema na’in-rua kanek tanba tenta hakalma situasaun iha sentru votasaun, nune’e Komandu munisípiu haruka kedan Forsa Reserva (Taskforce) no Unidade Espesiál Polisia (UEP) no Komandu Eskuadra Dom Aleixo ba no konsege hakalma situasaun no detein kedan suspeitu nai-21.
“Ita lori sira mai kedan iha Komandu PNTL hodi hatama sira iha sela detensaun durante oras 72 hodi halo prosesu ba Ministériu Públiku antes submete ba primeiru interrogatóriu iha Tribunál,” Superintendente Xefe, Henrique da Costa akresenta.
Alende ne’e, halo apreensaun ba karreta haat no motorizada lima ne’ebé deskonfia utiliza hosi suspeitu sira halo atus krime, nune’e evidénsia sira ne’e rai ona iha Komandu PNTL Dili atu kontinua investiga.
“Ami identifika katak sira ne’e apoia ba iha kandidatu Prezidente Repúblika balun ne’ebé la satisfas ho rezultadu eleisaun maka sira halo asaun ida ne’e,” nia akresenta.
Jornalista: Natalino Costa
Editór : Florencio Miranda Ximenes

