DILI, 21 marsu 2022 (TATOLI)— Atuál Asesór Jurídiku Ministériu Justisa, Tiago Amaral Sarmento, hateten nia parte simu ona kontaktu hosi Primeiru Ministru, Taur Matan Ruak, atu assume kargu Ministru Justisa hodi troka Manuel Cárceres ne’ebé sofre remodelasaun.
“Ha’u simu ona kontaktu hosi Primeiru Ministru, Taur Matan Ruak katak, ha’u nia naran tama lista membru Governu foun ne’ebé aban tuku 9:00, atu simu pose iha Palasiu Prezidensiál nuudar Ministru Justisa,” Tiago Sarmento hateten ba Agência TATOLI via rede sosiál, segunda ne’e.
Notísia relevante: Membru Governu na’in-haat tama iha lista remodelasaun
Tuir ajenda, tersa (22/3), Prezidente Repúblika, Francisco Guterres Lú-Olo fó pose ba membru Governu foun hanesan Tiago Amarál ba Ministru Justisa, Abél Pires asume kargu Ministru Obra Públiku hodi subtitui Salvadór Eugénio Soares dos Reis Pires, atuál Diretór Jerál ba kooperasaun externa iha Ministériu Finansa, António Freitas troka Sara Lobo Brites ba asume kargu Vise Ministro Finansa no atuál Prezidente Konsellu Veteranu Ainaro, Julio da Conceição “Loro Mesak” subtitui Gil da Costa Monetiro ‘Oan Soru’ ba kargu Sekretáriu Estadu ba Asuntu Antigu Kombatente Libertasaun Nasionál.
Nune’e, Tiago Sarmento dehan nuudar mate restu masakre Santa Cruz iha loron 12 novembru 1991, sente orgullu tanba hetan konfiansa hosi Xefe Governu hodi hola parte iha VIII Governu Konstitusionál hodi kaer pasta hanesan Ministru Justisa.
“Ha’u orgullu ho konfiansa ne’ebé Primeiru Ministru, Taur Matan Ruak iha hodi hili ha’u ba kargu Ministru Justisa no konfiansa hosi Estadu liuhosi Prezidente Repúblika, Francisco Guterres ne’ebe nomeia atan ha’u ba knaar ida ne’e,” Tiago Sarmento orgullu.
Tiago Sarmento hatutan: “agradese ba Maromak ho matebian sira no raí lulik Timór. Ha’u Nia belun mate restu 12 no tulun ho kbiit, nune’e ha’u simu knaar ida ne’e atu serbí ba rai no povu Timor-Leste, atu nune’e ha’u bele hala’o knaar tuir lei haruka”.
Molok ne’e, Primeiru Ministru (PM), Taur Matan Ruak, hateten prosesu halo remodeasaun ba membru VIII Governu Konstitusionál ne’e na’in-haat nia naran mak tama lista remodelasaun ne’e.
VIII Governu Konstitusionál forma liuhosi plataforma Partidu Libertasaun Populár (PLP), Frente Revolucionária de Timor-Leste Independente (FRETILIN) no Kmanek Haburas Unidade Nasional Timor Oan (KHUNTO).
Notísia relevante: PLP hahú prepara lista troka membru Governu ne’ebé hetan remodelasaun
Jornalista: Natalino Costa
Editór : Florencio Miranda Ximenes
