DILI, 23 marsu 2022 (TATOLI)–Ministru Finansa, Rui Augusto Gomes, aprezenta proposta ida iha reuniaun Konsellu Ministru, hodi delibera autoriza selebrasaun ba alterasaun dahuluk akordu kontribuisaun finanseira hosi Estadu Unidu Amérika (EUA) liuhosi United States Agency for International Development (USAID) ba Timor-Leste.
“Alterasaun ne’e ho objetivu atu revee valór kontribuisaun finanseira hosi Estadu Unidu Amérika iha ámbitu akordu ida, ne’ebé aumenta valór kontribuisaun finanseira hosi $17.900.000 ba millaun $36.558.837,” Ministru Prezidénsia konsellu ministru, Fidelis Manuel Leite Magalhães, relata hafoin reuniaun ezekutivu iha Palásiu Governu kuarta ne’e.
Notísia relevante: Timor-Leste ho EUA selebra akordu kontribuisaun finanseiru millaun $17,9
Tuir Portavós Governu, konstribuisaun ne’e hodi fó apoia ba área sira ne’ebé ligadu ho prioridade dezenvolvimentu Timor-Leste.
Ho nune’e, Konsellu Ministru delibera ona hodi fó podér tomak ba Ministru Finansa hodi reprezenta Governu Timor-Leste asina akordu ne’e.
Antes ne’e iha loron 18 maiu 2021, Governu Timor-Leste reprezenta hosi Ministru Finansa, Rui Augostu Gomes no EUA reprezenta hosi Diretór misaun USAID, James Wright, asina akordu kontribuisaun finanseiru ba objetivu dezenvolvimentu ho montante millaun $17,9 hosi totál kontribuisaun estimadu millaun $92,3.
Kontribuisaun finanseira ne’e sei aloka ba setór saúde, boa governasaun no setór la’ós petrolíferu hanesan turizmu, agrikultura no ekonomia, ne’ebé konsidera hanesan setór potensiál atu diversifika ekonomia maibé seidauk dezenvolve ho di’ak.
Jornalista : Antónia Gusmão
Editora : Julia Chatarina
