DILI, 24 marsu 2022 (TATOLI)–Ministru Finansa (MF), Rui Augusto Gomes, iha reuniaun Konsellu Ministru semana ne’e, aprezenta proposta alterasaun dahuluk ba kontribuisaun finanseira akordu Objetivu Dezenvolvimentu entre Governu Timor-Leste no Estadu Unidu Amérika (EUA) liuhosi ajénsia United States Agency for International Development (USAID).
Akordu alterasaun ne’e ho objetivu atu revee valór kontribuisaun finanseira dahuluk hosi EUA, ne’ebé aumenta valór hosi millaun $17,9 ba millaun $36,5, hosi totál millaun $92,3 ba tinan-haat ho balun to’o dezembru 2025.
“Aumentu valór kontribuisaun finanseira ne’e hatudu Governu Estadu Unidu Amérika nia konfiansa ba Governu no Povu Timor-Leste,” Ministru Rui Gomes hateten liuhosi nota ne’ebé Agência TATOLI asesu hosi MF, kinta ne’e.
Notísia relevante: Governu revee valór kontribuisaun finanseira hosi EUA
Governante ne’e konsidera, orsamentu ne’e sei haforsa liután USAID nia apoiu ba Timor-Leste iha setór saúde, boa governasaun no setór la’ós petrolíferu hanesan turizmu no agrikultura.
“Setór rua ne’e konsidera potensiál tebes atu diversifika Timor-Leste ninia ekonomia, ne’ebé seidauk dezenvolve ho di’ak iha pasadu,” nia akresenta.
Enkuantu, iha loron 18 maiu 2021, Ministru Finansa reprezenta Estadu Timor-Leste no Diretór USAID Timor-Leste, James Wright reprezenta Governu Estadu Unidu Amérika, asina ona Akordu Kontribuisaun Finanseira ba Objetivu Dezenvolvimentu ho montante dahuluk millaun $17,9 hosi totál kontribuisaun estimativa millaun $92,3.
Jornalista : Antónia Gusmão
Editora : Julia Chatarina
