LAUTÉM, 27 marsu 2022 (TATOLI)–Polísia Nasionál Timor-Leste (PNTL) munisípiu Lautém, domingu ne’e, selebra loron PNTL ba da-XXII ho tema ‘Prontu hametin lei no ordén ho imparsiál no neutru hodi prevene krime iha Estadu Dekmokrátiku’.
Iha ámbitu ne’e, Komandante PNTL munisípiu Lautém, Superintendente Polísia, António Rego Fernandes, iha esperansa membru sira bele hakat metin liután ba povu.
“Membru PNTL Lautém ne’ebé ha’u hadomi, imi tenke kontinua nafatin servisu hanesan fatuk angular ba Polísia ne’ebé forte, fiar metin iha mudansa ho neon iha promesa sosiál no esperansa hakat ba oin sei metin liután ba povu Timor-Leste tomak,” Komandante PNTL munsipál hateten iha Komandu PNTL Lautém.
Notísia relevante: Komandante PNTL husu membru sai forte fó seguransa ba povu-nasaun
Nune’e, nia husu membru sira atu kumpre didi’ak misaun, tanba segredu susesu mak sei koloka nafatin konfiansa fiar metin iha servisu ho esforsu fíziku hosi membru mane no feto.
Aleinde ne’e, Komandante nota mós katak dalaruma sosiedade hamosu kompreende sala, maibé sira firme no respeitu nafatin membru Polísia.
Nia husu mós atu membru hatudu serbisu profesionál no prontu hala’o knaar saida de’it no bainhira de’it bainhira povu presiza.
“Ha’u kontinua orienta imi to’o imi-nia determinasaun no enerjia hodi fiar metin dezeju futuru ne’ebé hakruuk onestu ba jerasaun sira, liuliu hakruuk hosi liberdade dezenvolvimentu sustentável hosi seguransa tomak. Tanba PNTL harii ho nia lema serví no protejer, ho ida ne’e PNTL mantein pás,” nia dehan.
PNTL Lautém presiza transporte
Iha biban ne’e, Komadante PNTL Lautém, hateten, daudaun ne’e sira presiza karreta hitu hodi halo operasaun ba atividade PNTL munisipál, tanba karreta sira ne’ebé iha ho kondiasaun ladi’ak hotu.
“Difikuldade ne’ebé ami enfrenta mak kona-ba transporte no kondisaun báziku sira, hanesan infraestrutura ba edifísiu no mós kazerna ne’ebé mak durante ne’e seidauk rezolve, maibé ami presiza liu mak karreta tanba Komandu PNTL Lautém iha Eskuadra neen karreta laiha hotu. Tanba ne’e presiza karreta foun hitu, nune’e neen ba Eskudra sira no ida iha munisípiu,” nia tenik.
Tuir Komandante ne’e, kestaun hirak ne’e hato’o ona iha proposta ba Komandu PNTL Dili, ne’ebé Komandu mak sei haree no haruka ba Ministériu Interiór hodi husu ba Governu konsidera nune’e bele rezolve.
“Ita-nian proposta sira sempre hato’o tanba kada tinan planu asaun anuál sempre halo, maibé ne’e depende Governu nia kbiit hodi tau-matan ba kondisaun sira ne’e, maibé daudaun ne’e planu komandu sei sosa karreta hamutuk 90. Espera ita mós bele hetan hotu nune’e bele apoiu servisu munisípiu,” nia tenik.
Iha seremónia selebrasaun aniversáriu PNTL ba da-XXII, marka prezensa hosi Sekretáriu Estadu Kooperativa (SEKoop), Elizário Ferreira, Administradór Munisípiu Lautém, Domingos Sávio, inklui Veteranu no komunidade lokál.
Jornalista : Arminda Fonseca
Editora : Julia Chatarina
