PJR relata krime eleitorál ba Xefe Estadu

DIILI, 28 marsu 2022 (TATOLI)—Adjunta Prokuradora Jerál Repúblika (PJR), Remizia de Fátima da silva, relata krime eleitorál ne’ebé sira rejista no akontese iha prosesu kampaña eleitorál to’o eleisaun prezidensiál ne’ebé realiza iha 19 marsu 2022 ba Prezidente Repúblika, Francisco Guterres Lú Olo.
Notísia Relevante: PNTL rejista kazu krime eleitorál ualu durante eleisaun prezidensiál
“Iha enkontru ne’e informa krime eleitorál ne’ebé akontese iha kampaña no eleisaun ba Prezidente Repúblika,” PJR substitui no atuál Adjunta PJR ne’e hateten ba jornalista sira hafoin ramata sorumutu ho Xefe Estadu iha Palásiu Prezidensiál, Nicolau Lobato, Bairru Pite, segunda ne’e.
Nia dehan, tuir dadus krime eleitorál iha Dili kazu neen (6) kompostu hosi Baucau kazu ida (1) liu-liu ba prosesu sira perturbasaun aktu eleitorál durante iha loron eleisaun nian.
Prosesu hirak ne’e, nia dehan, kaer ho flagante deleitu lori tiha ona ba Tribunál no iha prosesu sumáriu ne’ebé hetan ona desizaun hosi Tribunál iha Dili no Baucau.
“Úniku kazu ida perturbasaun ba aktu eleitorál hanesan ita hatene iha Fomento. Kona-ba ida-ne’e só aprezenta ba primeiru interrogatóriu nia desizaun aprezentasaun períodika tanba akontesimentu refere la hanesan ho sira seluk. Pertubasaun aktu eleitorál ho violénsia no uza mós arma ne’ebé faze investigasaun la’o hela. Nune’e mós propaganda aktu eleitorál iha Liquiça no Bairro dos Grillos la’o hela,” nia hateten.
Aleinde ne’e, Adjunta PJR ne’e relata mós servisu Ministéiru Públiku (MP) nian ba kazu sira iha nivél territóriu nasionál, ne’ebé to’o daudaun ne’e kazu entrada ka tama prosesu normál pendente iha tinan 2022 hamutuk 2750 no agora redús ba 2369.
Nune’e mós, espesífiku ba kazu korrupsaun ninian iha prosesu pendente hamutuk 108 no agora redús ba 105.
“Atualiza prosesu kazu pendente la’o iha Ministéiru Públiku iha nivél nasionál no kazu korrupsaun ne’ebé akontese hala’o hela investigasaun iha Gabinete Kombate Korrupsaun no Kriminalidade Organizadu iha Ministériu Públiku,” nai dehan.
Durante sorumutu ne’e, Prezidente Repúblika fó hanoin nafatin ba Ministéiru Públiku atu hala’o knar tuir dalan lei ne’ebé iha no haree kona-ba kazu pendente hodi halo investigasaun tuir lei haruka.
Notísia Relevante: Tribunál aplika TIR ba arguidu nain-21 atake sentru votasaun Fomentu II
Jornalista : Nelson de Sousa
Editór : Cancio Ximenes

