DILI, 02 abril 2022 (TATOLI)—Reprezentante estudante hosi munisípiu 12 inklui Rejiaun Administrativa Espesiál Oé-cusse Ambeno (RAEOA), Rosário Doloroso Ximenes, husu órgaun eleitorál hadi’a jestaun di’ak, nune’e sidadaun sira labele lakon votu iha Eleisaun Prezidensiál 2022 segunda volta.
Estudante sira konsidera Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE, sigla portugés) presiza sensibiliza nafatin atu estudante no komunidade hosi munisípiu bele hetan oportunidade halo rejista iha sentru paralelu sira Dili.
“Maibé atu tama tan ba eleisaun segunda volta, STAE deklara sei laiha tan rejistu ba sentru paralelu iha Dili. Tanba ne’e, hanesan estudante hakarak hato’o preokupasaun hodi husu ba STAE no CNE hadi’a jestaun ho di’ak hodi kontinua loke sentru votasaun paralelu atubele fasilita estudante universitáriu sira bele vota iha Dili,” Reprezentante estudante hateten liuhosi konferénsia imprensa ne’ebé hala’o iha jardín 5 de Maiu, Colmera, sábadu ne’e.
Notísia relevante: Eleitór la vota iha sentru votasaun paralelu tanba la rejista iha STAE
Tuir Rosário Ximenes, estudante barak mak foin lalais la fila munisípiu atu ezerse direitu votu ho hanoin ida órgaun eleitorál sira bele fasilita, maibé ikus mai lakon direitu votu iha Dili.
“Ami estudante barak mak lakon ami-nia votu ka la tuir vota tanba de’it Sekretariadu STAE no CNE la halo sensibilizasaun klaru atu estudante sira bele ba rejistu iha sentru paralelu sira hodi ezerse ami-nia direitu iha loron 19 marsu liubá,” nia akresenta.
Tanba eleisaun segunda volta ne’e iha kandidatu José Ramos Horta (1) no Francisco Guterres ‘Lú Olo’ (2) de’it mak kompete, tanba ne’e estudante sira lakohi akontese tan hanesan eleisaun primeira volta, ne’ebé sidadaun barak mak lakon votu ba kandidatura hamutuk 16.
“Molok atu hakat ba eleisaun segunda volta, husu ba STAE no CNE tenke halo preparasaun di’ak atu hamosu nafatin sentru paralelu iha Dili maibé tenke halo mós sensibilizasaun,” nia tenik.
Ba kestaun ne’e, estudante sira prontu mobiliza dadus sira atu submete ba STAE atu hakma’an serbisu órgaun eleitorál.
“Husu ba STAE no CNE labele hamosu konfuzaun no diskriminasaun ba sentru votasaun paralelu iha Dili, tanba foin lalais halo ona diskriminasaun boot ba komunidade ein jerál hosi munisípiu ne’ebé mai buka moris iha Dili no halo esforsu-an hakarak filafali ba munisípiu maibé la konsege,” estudante ne’e dehan.
Nune’e, estudante sira husu órgaun eleitorál foti desizaun ruma liga ho preokupasaun ne’e iha loron-tolu nia laran tanba bainhira laiha resposta maka sira sei hakat ba Parlamentu Nasionál.
Tuir kalendáriu eleitorál, kampaña prezidensiál segunda volta hahú iha loron 02 to’o 16 abril no loron votasaun prezidensiál iha 19 abril.
Antes ne’e, Diretór Jerál STAE, Acilino Manuel Branco, hateten, eleitór sira ne’ebé la konsege vota iha sentru votasaun paralelu tanba sira foti de’it deklarasaun xefe suku iha sede suku maibé la rejista iha STAE nune’e naran la sai iha sistema.
Bazeia ba dadus resensiamentu eleitorál, eleitór ne’ebé ezerse votu iha sentru votasaun paralelu tolu iha Dili hamutuk 4.032, maibé hosi dadus ne’e balun de’it mak vota enkuantu seluk la konsege tanba naran la sai.
Totál eleitór iha territóriu tomak hamutuk 864.754 no iha diáspora hamutuk 1.277.
Sentru votasaun paralelu ne’e sentraliza iha kapitál nasaun, destinada ba eleitór inskritu sira iha unidade jeográfika resensiamentu ne’ebé lokalizada fora hosi munisípiu Dili, ne’ebé hetan impedimentu, ho razaun médika, eskolár ka ezersísiu funsaun públika, bainhira dezloka ba lokalizasaun ne’ebé de’it iha sentru votasaun sira.
Kritériu atu vota iha sentru votasaun paralelu, ba estudante, profesór no dosente sira, maka eskola ida nia superiór hanesan diretór eskola ka reitór universidade mak halo deklarasaun ruma liuhosi Ministéiru Edukasaun Juventude no Desportu (MEJD) mak enkamiña ba STAE.
Jornalista : Tomé Amado
Editora : Julia Chatarina
