LIQUIÇÁ, 03 abril 2022 (TATOL)–Kandidatu Prezidente Repúblika (PR) hosi Partidu Congresso Nacional de Reconstrução de Timor (CNRT) períodu 2022-2027, ho númeru sorteiu 01, José Ramos Horta, promete bainhira hetan fiar hosi povu, sei komunika ho parseiru internasionál sira hodi kria empregu ba joven sira.
“Ha’u hatene joven barak mak serbisu laiha, ha’u simu vídio no imajen barak, ha’u haree ema sira ne’e kiak duni, tanba ne’e ha’u sei ko’alia ho joven sira tanba fututu rai ida-ne’e iha joven sira-nia liman. Tanba ne’e ha’u promete sei serbisu ho Governu, Parlamentu, no komunidade internasionál hodi haree programa di’ak hodi kria empregu ba joven sira,” Horta hato’o kompromisu polítiku, durante kampaña prezidensiál segunda volta ho tipu mini-kampaña, iha sede partidu CNRT, iha munisípiu Liquiçá, domingu ne’e.
Notísia relevante: Horta promete promove diálogu ho partidu asentu parlamentár
Kandidatu ne’e hakarak koopera ho Governu hodi tau prioridade ba setór edukasaun no saúde.
“Estadu tenki tau-matan ba edukasaun no saúde, liliu ba kosok oan no inan isin-rua, tanba inan isin-rua tenki tau-matan atu labele moras,” nia akresenta.
Aleinde ne’e, bainhira eleitu, Horta hakarak ko’alia ho médiku espesialista estranjeiru sira hodi haree ba moras ne’ebé akontese barak iha rai-laran.
“Sira-nia estudu ne’e hatudu katak Timor-Leste iha problema fuan barak tebes, mai kedas hosi kosok-oan sira, hosi uma-laran, ijiene no buat oioin, entaun labarik sira ne’e moris ho moras sira ne’e barak iha Timór,” nia tenik.
Horta mós tau prioridade atu redús ka halakon moras dengue ne’ebé daudaun ho númeru a’as no halakon ema barak nia vida, liuliu labarik sira, inklui mós hakarak elimina moras tuberkuloze
Iha biban hanesan, Prezidente Partidu Demokrátiku (PD), Mariano Assanami Sabino, husu ba apoiante sira ne’ebé durante ne’e apoia nia, liliu joven sira, atu hothotu iha loron 19 abril 2022, tenki vota ba kandidatu númeru sorteiu 01, Ramos Horta.
“Joven mileniál sira ne’ebé durante ne’e rona ha’u ko’alia programa fibra ótika, atu fasilita liután joven hodi koñese liután teknolojia, pesoál ne’ebé koñese teknolojia antigamente mak Ramos Horta. Tanba ne’e ha’u husu ba movimentu joventude sira hotu atu nafatin apoia no esperansa ba ida ne’ebé koñese liu ona teknolojia. Ita tenki apoia, nune’e dijitaliza sosiedade no Timor-Leste ne’ebé transforma sai sivilizadu uza teknolojia,” Assanami apela.
Mariano Asanami dehan, joventude loriku asu’wain sira antes ne’e luta ho esperansa maka joven sira agora tenki sai joven ida di’ak ba futuru nasaun nian.
“Tanba ne’e maka atu sira moris di’ak tenki kria postu serbisu, nune’e sira hetan moris di’ak hodi konta luta ba sira ne’ebé halo ona iha tinan hirak liubá,” nia fó hanoin.
Atividade mini-kampaña ne’ebé hahú iha tuku 15:00 to’o 17:30, hetan supervizaun hosi Komisaun Nasionál Eleisaun (CNE, sigla portugés), observadór internasionál, no hetan seguransa hosi Polísia Nasionál Timor-Leste (PNTL).
Tuir oráriu hosi CNE, iha loron 04 abril Kandidatu PR, Ramos Horta sei realiza kampaña ho tipu mini-kampaña iha munisípiu Aileu.
Jornalista : Antónia Gusmão
Editora : Julia Chatarina
