iklan

BAUCAU, HEADLINE, MUNISÍPIU, SEGURANSA

Dezintendimentu entre motorista iha Baucau, rezulta ema ida kanek no vidru rahun

Dezintendimentu entre motorista iha Baucau, rezulta ema ida kanek no vidru rahun

Bís Luabere ne'ebé vidru rahun hafoin mosu konfrontu entre motorista iha terminál Baucau, Sesta (08/04). Imajen: Agénsia TATOLI/Natalino Belo

BAUCAU, 08 abríl 2022 (TATOLI) – Konfrontu entre motorista bís Baucau ne’ebé akontese iha terminál rezulta vidru bís rua rahun no feto ida hetan kanek kauza hosi hadau malu pasajeiru.

Tuir kronolojia, inísiu kazu refere akontese iha terminál Vila Nova iha loron kinta, 07 abríl entre morista bís ho naran Remember ho xapa-matríkula 37.458 TL inisiál FdS idade 34 no motorista JCQ idade 30 hosi bís Luabere xapa-matríkula 36.643 TL kauza hosi hadau malu pasajeiru.

Bís Remember ne’ebé vidru rahun hafoin mosu konfrontu entre motorista iha terminál Baucau, sesta (08/04). ImajenTATOLI/Natalino Belo.

“Kazu ne’e akontese tanba sira hadau malu pasajeiru,” Komadante Polísia Nasionál Timor-Leste Munisípiu Baucau, Superintendente António de Sá hateten iha Vila Nova, sesta ne’e.

Motivu seluk hosi insidente refere realsiona ho asaun protesta mina folin sa’e ne’ebé antes ne’e motorista sira deside hapara atividade movimentasaun maibé iha bís balun mak sei hala’o operasaun nune’e hamosu dezintendimentu.

Kazu refere kontinua akontese iha loron sesta ne’e, ne’ebé envolve ona grupu maske antes ne’e parte rua konkorda atu rezolve nu’udar família iha eskuadra Baucau Vila.

Hosi konfruntu refere rezulta mós pasajeiru feto ida hetan kanek iha liman, parte-loos no vidru parte karuk hosi bis Luabere rahun no vidru parte oin hosi bís Remember hetan tuda.

Entretantu, PNTL Eskuadra Baucau Vila atua kedas situasaun iha fatin akontesimentu no asegura ona autór motorista nain-rua iha sela polísia hodi kontinua prosesu investigasaun.

“Agora daudaun submete hela ba prosesu investigasaun iha eskuadra Baucau Vila,” António de Sá akresenta.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!