DÍLI, 12 abríl 2022 (TATOLI) – José Ramos Horta, kandidatu Prezidente Repúblika husu ba povu Timor-Leste atu vota ba númeru sorteiu 1 tanbá sei lori loron foun no Estadu foun ba povu ida ne’e.
“Vota númeru 1 iha loron 19 abril tanba imi sei vota ba loron foun, esperansa foun no Estadu foun ba rai ida ne’e”, dehan nia iha komísiu nasionál, iha Tasi Tolu, Díli, segunda ne’e.
Ramos Horta promete katak bainhira eleitu sai Xefe Estadu mak sei serbisu maka’as no halo diálogu ho partidu polítiku sira iha uma fukun Parlamentu Nasionál.
Objetivu husi ko’alia ba malu (diálogu) mak atu hetan konfiansa maioria husi deputadu sira.
“Bainhira ha’u hetan tiha lejitimidade iha fulan-abril hanesan Prezidente Repúblika mak halo dialágu ho deputadu matenek balun husi PLP, KHUNTO no FRETILIN atubele manán maioria iha Parlamentu no kria Governu foun ida”, nia afirma.
“Ha’u sei buka diálogu mós ho ida ne’ebé mak lakon iha eleisaun. Bainhira ita manán, haraik an ba ida ne’ebé lakon”, promete.
Ramos Horta husu mós ba fiskál sira husi CNRT atu kontinua serbisu maka’as iha loron eleisaun hodi prevene atu irregularidade oioin iha sentru votasaun sira hodi bele fó vitória ba nia.
Iha biban ne’e agradese ba partidu, movimentu oioin, arte marsiál no rituál ne’ebé mak apoia durante ne’e.
Bainhira eleitu, Ramos Horta sei presta atensaun ba setór agrikultura no infraestrutura iha rai-laran.
Nune’e mós Prezidente Partidu Congresso Nacional da Reconstrução Timorense (CNRT), Kayrala Xanana Gusmão, agradese ba ema hotu ne’ebé apoia.
“Ha’u espera katak iha segunda volta povu hotu hili nia [Ramos Horta] sai Xefe Estadu”, tenik nia.
Xanana esplika katak Ramos Horta seidauk manán, tanbá ne’e presiza povu ida-idak nia votu iha loron 19 abril.
Prezidente CNRT esklarese tan razaun partidu hili Ramos Horta tanba atu salva de’it Konstituisaun Repúblika Timor-Leste. “Ramos Horta ema ida matenek no peritu tebes iha área oioin hodi haloos buat ne’ebé mak laloos iha tinan liman nia laran”.
Iha sorin seluk, Prezidente Partidu Demokrátiku (PD), Mariano ‘Assanami’ Sabino, dehan Ramos Horta ema ne’ebe hatene rekonsilia no hakuak ema hotu inklui partidu polítiku sira hodi bele rezolve problema sira iha tinan 2007 hamutuk ho Xanana Gusmão.
Nune’e mós Prezidente Partidu Demokrátiku Repúblika Timor (PDRT), Agostinho Gomes, husu atu apoia Ramos Horta no Xanana Gusmão hodi halo repozisaun órden konstitusionál.
Koordenadór CNRT Munisipiu Dili, Luís Ximenes, hateten Ramos Horta sei kria pás no estabilidade iha país.
“Iha primeira volta manán maioria iha kapitál ho votu boot, nune’e husu ba ema hotu atu vota ho pás ba rai ida ne’e”.
Jornalista: Domingos Piedade Freitas
Editora: Maria Auxiliadora
