DILI, 13 abríl 2022 (TATOLI)— Kandidatru Prezidente Repúblika períodu 2022 too 2027, ho númeru sorteiu 1, José Ramos Horta, hateten bainhira eleitu ba Xefe Estadu sei koopera ho Governu estabelese akordu tripartida entre Timor-Leste, Austrália no Indonézia atu asegura rikusoin Tasi Timór.
“Atu asegura rikusoin iha tasi-laran, ha’u prefere estabelese akordu tripartida (Timor-Leste, Austrália no Indonézia) atu oinsá hamutuk hodi asegura seguransa iha área tasi nian,” Kandidatu PR ne’e hateten iha ámbitu debate entre kandidatu Prezidente Repúblika númeru 1 no númeru 2 ne’ebé hala’o iha salaun Mahoka Osindo, kuarta kalan ne’e.
Notisia relevante:Horta hakarak koopera ho parte hotu dezenvolve ekonomia
Tuir Horta atu kontrola tasi liuliu kontrola zona ekonómiku ezklusivu ne’e la’ós Timor-Leste mesak, maibé presiza liuhosi akordu tripartida. Hanesan meiu ida mós kombate peska ilegál.
Tanba, akordu tripartida ne’e hanesan meiu importante ida atu nasaun viziñu tolu ne’e bele asegura no proteje hamutuk zona ekonómiku no atividade peska ilegál ho diak liu.
“Akordu ne’e fasilita nasaun tolu ne’e bele halo movimentu hodi asegura malu área tasi hanesan Indonézia bele mai asegura ita nia rai no Austrália mós inklui ita mós bele ba halo seguransa too iha sira nian,” dehan Horta.
Notisia relevante: Ramos Horta: Hili ha’u, hili Estadu foun no lori esperansa ba povu
Jornalista: Natalino Costa
Editór : Florencio Miranda Ximenes
