Ramos Horta gaña votu 35.536 iha Bobonaro no Lú Olo 16.371
BOBONARO, 20 abríl 2022 (TATOLI) – Rezultadu apuramentu munisipál hatudu katak kandidatu Prezidente Repúblika ho númeru sorteiu (1), José Manuel Ramos Horta, gaña ho votu 35.536 (68,46%) iha Bobonaro no Francisco Guterres ‘Lú Olo’ hetan votu 16.371 (31,54%).
“Ami hakarak informa rezultadu apuramentu munisípiu Bobonaro hosi totál akta 130 hatudu ita-nia kandidatu númeru sorteiu (1) mak hetan vitória ho votu 35.536 no kandidatu númeru (2) hetan segundu lugár ho votu 16.371,” Diretór STAE Munisípiu Bobonaro, Mariano Viegas Amaral, hateten iha salaun apuramentu Bobonaro, kuarta ne’e.
Prosesu apuramentu iha STAE munisípiu hala’o iha loron tersa, 19 fulan-abríl, purvolta tuku 20:15 no finaliaza iha loron kuarta, 20 fulan-abríl iha oras 17:30 lokraik ne’ebé superviziona hosi Komisaun Nasionál Eleisaun (CNE, sigla portugés), monitoriza hosi Provedoria Direitu Humanu no Justisa (PDHJ), observadór nasionál, internasionál no hetan partisipasaun másima hosi fiskál kanidatu na’in-rua.
Tuir planu iha loron-kinta, tuku 08:00 dadeersan ekipa STAE no CNE sei transporta materiál eleisaun hirak-ne’e ba salaun apuramentu nasionál no sei hetan seguransa hosi Polísia Nasionál Timor-Leste (PNTL).
“Ami hanesan órgaun eleitorál biban ne’e hakarak agradese ba parte hotu ne’ebé mak durante ne’e apoiu no kontribui ona dezde inísiu prosesu verifikasaun to’o faze apuramentu munisipál finál, maske ita iha problema tékniku balun maibé konsege realiza prosesu ida-ne’e ho susesu,” nia hateten.
Totál eleitór ne’ebé ezerse direitu votu iha eleisaun prezidensiál iha Bobonaro na’in-52.499 inklui sentru votasaun paralelu na’in-379 hosi totál eleitór 70.311, votu nulu 408 (0,78%), votu reklamadu 45 (0,09%), rezeitadu sia (0,02%), branku 130 (0,25%), nune’e totál votu válidu 51.907 (98,87%).
Notísia relevante: EDTL Bobonaro klarifika ahi mate derrepente iha momentu prosesu kontajen votu
Jornalista : Sérgio da Cruz
Editór : Evaristo Soares Martins
