DILI, 21 abril 2022 (TATOLI)–Prezidente Repúblika (PR) eleitu, José Ramos Horta, simu ona felisitasaun hosi líder mundiál barak inklui eis Sekretáriu Jerál (SekJer) Organizasaun Nasaun Unida (ONU), Ban Ki-Moon, no Prezidente Repúblika (PR) Portugal, Marcelo Rebelo.
“Ha’u simu mensajen felisitasaun hosi Embaixada sira iha Dili, nune’e mós líder boot hosi Ázia, Abudabi, Dubai, líder boot balun iha França, eis Sekretáriu Jerál ONU, Ban Ki-Moon, eis Ministériu Negósiu Estranjeiru hosi Singapura, Tailándia, Japaun no seluk tan. Ha’u simu mensajen lubuk ida, horiseik Prezidente Repúblika Portugal, ha’u koñese Prezidente ne’e pesoalmente di’ak, nia konfirma sei mai partisipa iha aniversáriu independénsia ba dala-20 no ba seremónia pose,” Horta anunsia liuhosi konferénsia imprensa ne’ebé hala’o iha sede Kandidatu PR, Hudi-laran, kinta ne’e.
Notísia relevante: Xanana Gusmão: “Vitória la’ós Horta nian maibé povu”
Aleinde ne’e, Ramos simu ona mós mensajen hosi atuál Prezidente Repúblika, Francisco Guterres ‘Lú Olo’ inklui konvite hodi halo seremónia Hand Over.
Horta seidauk simu mensajen ruma hosi líder nasionál inklui Primeiru-Ministru, Taur Matan Ruak.
Tuir dadus apuramentu nasionál eleisaun prezidensiál segunda volta hosi Sekretariadu Tékniku Administrasaun Eleitorál (STAE) hatudu katak José Ramos Horta ho votu 397.145 (62,09%) no Francisco Guterres ‘Lú Olo’ ho votu 242.440 (37,91%).
Jornalista : Antónia Gusmão
Editora : Julia Chatarina
