DILI, 25 abríl 2022 (TATOLI)—Instituto Nasionál Saúde (INS) ho organizasaun São João de Deus fó formasaun ba Jerente Saúde na’in 23 hodi kontinua hasa’e sira ninia kapasidade no abilidade ba mudansa implementasaun planu estratejiku iha ida-idak nia instituisaun.
Diretóra INS, Domingas da Costa Pereira hatete, São João de Deus nu’udar parseiru INS ne’ebé durante ne’e fó ona formasaun ba Jerente Saúde.
“São João de Deus hanesan parseiru ne’ebé mak durante fó formasaun ba jerente saúde sira ne’ebé servisu iha Ospitál Nasionál Guido Valadares (HNGV), Ospitais referais, servisu saúde munisípiu no Ministériu Saúde inklui mós servisu autonomu sira. Tanba sira, mak save ba mudansa implementasaun,” dehan Diretora ne’e iha ninia diskursu ba serimonia treinamentu Jerente Saude iha salaun INS Comoro, segunda ohin.
Nia dehan, iha tinan 2022, São João de Deus hetan apoiu finanseiru husi Kompañia Santos no kontinua fó formasaun saúde ba grupo rua no kada partisipante iha na’in 23 too 25. Formasaun ne’e hahú iha semana ida ne’e nia laran.
“Husi Instituto Nasionál Saúde ho nia kompetensia no esforsu atu buka rekursu sufisiente atu kapasita jerente saude sira iha nivel hotu-hotu,” Nia relata.
Iha fatin hanesan, Country Manager Viqueque husi organizasaun São João de Deus, Lorenco Camnahas dehan, formasaun ba Jerente Saúde importante tebes iha sistema saúde. Nune’e oinsá bele oferese ho kuidadu saúde ba populasaun timor laran tomak.
“Kursu ne’e sei aprende iha área tolu oinsá atu hadia kualidade, iha parte lideransa, nomós iha jestaun no rekursu umanus. Importante tebes atu kuidadu saúde tanba ita boot sira bainhira remata formasaun sei fo konsulta ba pasiente sira iha sentru saude ho kuidadu,” nia dehan.
Nune’e mos Representante Organizasaun Mundiál Saúde iha Timor Leste, Arvind Mathur dehan, programa formasaun jestór saúde responde ba estratejia Ministériu Saúde oinsa atu desenvolve rekursu umanu Saúde ne’ebé hakerek iha Planu estratejia nasionál seitór Saúde tinan 2021-2030 no alinã ho estratejia rekursu umanu tinan lima nian.
“Ita tenki hatene katak kapasidade jestaun no lideransa iha serbisu saúde ne’e importante hanesan parte kritiku ida husi implementasaun no mantein asistensia saúde ne’ebé kualidade ba pasiente,”Nia hateten.
Nune’e mós Minstra Saúde , Odete Maria Freitas Belo subliña, kapasidade lideransa no jestaun iha setór servisu saúde sira mak parte esensiál ba implementasaun no mantein kuidadu hodi asegura pasiente seguru no seguransa ba pesoál saúde sira. Evidensia hatudu katak hahalok lideransa no jestaun sira ne’ebé efikás iha setór kuidadu saúde iha relasaun ho pasiente nia melloramentu seguransa no esperiensia.
“Programa formasaun ba Jerente Saúde atu fó apoiu ba Ministeriu Saúde atu responde ba sira nia responsabilidade profisionál. Ida ne’e atu oinsa bele lidera no jere servisu kuidadu saúde ho mekanizmu ne’ebé efetivu no efisiente hodi nune’e bele envolve mos sira iha pratika bazeia ba evidénsia ne’ebé lori sira ba aprendizajen no dezenvolvimentu karreira iha sira-nia moris tomak,” Nia dehan.
Jornalista : Felicidade Ximenes
Editora : Armandina Moniz
