DILI,27 abríl 2022 (TATOLI)— Ministériu Saúde (MS) sei distribui ventiladór 50 ba iha Ospitais Referensia iha munsípiu sira hodi bele halo atendimentu ho diak liu tan ba pasiente ho kondisaun krítiku sira.
Liafuan ne’e, Diretóra Jerál Prestasaun Saúde Ministériu Saúde, Odete da Silva Viegas dehan ba jornalista sira bainhira remata enkontru kona ba unidade kuidadus intensivu iha Hotel Timor, ohin.
“Ami sei distribui ventiladór 50 ba iha Ospitais Referensia iha munisípiu sira hodi halo atendimentu ba pasiente krítiku sira para bele reduz populasaun ne’ebé halerik konaba sira ninia moras no la presiza too iha Hospital nasionál,” Diretora Odete dehan.
Durante pandemia MS sosa ventiladór 50 resin hodi atende ba pasiente moras COVID-19 maibé agora daudaun COVID-19 menus ona. Ho nune’e MS sei uza fali ba ICU sira iha munisípiu hodi atende ba moras grave.
“Tanba makina ventiladór ne’e ita sei tau iha munisípiu sira hodi fó tratamentu saúde ba pasiente moras krítiku sira. Ita mós husu ba Instituto Nasionál Saúde (INS) nafatin fó formasaun ba mediku sira oinsá sira jere pasiente ho kondisaun moras todan ho diak,” Nia dehan.
Nia informa, MS mos komesa investe iha parte sira ne’e, hodi bele reduz pasiente hodi halo transferensia ba rai liur. Tanba, estadu gastu osan boot kuandu haruka pasiente ba rai liur.
“Tanba ne’e mak iha semana kotuk ita inagura ona ICU no laboratoriu iha Maliana no aban sei inagura tan ICU iha Suai. Ita-nia mediku espesialista sira mos iha ona,” nia afirma.
Tanba ne’e, hateten Odete, MS sei bolu instituisaun autonomu sira hanesan Servisu Autonomu Medikamentus Ekipamentu Saúde (SAMES) Instituto Nasionál Saúde (INS), Laboratoriu Nasional Saúde (LABNAS), Ospitál Nasionál Guido Valaadres (HNGV), no Servisu Nasionál Ambulansia Emerjénsia no Medikamentu( SNAEM) hodi hola parte.
Jornalista : Felicidade Ximenes
Editóra : Armandina Moniz
