DILI, 28 abríl 2022 (TATOLI)—Prezidente Repúblika, Francisco Guterres ‘Lú Olo’, preokupa ho sasán nesesidade bázika nia folin ne’ebé sae makaas iha rai-laran no preparasaun serimónia toma pose ba Prezidente Repúblika eleitu, José Ramos Horta, iha 20 maiu.
“Ohin enkontru semenál ho Prezidente Repúblika ko’alia asuntu rua. Ida, preokupasaun kona-ba sasán ba protudu sira no nesesidade bázika sa’e makaas iha ita-nia rai laran, liu-liu hahán ne’ebé Prezidente Repúblika preokupa loos. Ida seluk, Asuntu seluk mak preparativu serimónia toma pose ba Prezidente Repúblika eleitu iha 20 maiu ne’e,” Primeiru-Ministru, Taur Matan Ruak, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairu Pite, kinta ne’e.
Tanba ne’e, Governu presiza fó importánsia mak tau matan ba protudu lokál tanba hein de’it buat ne’ebé mai hosi rai-li’ur la preokupa ho buat ne’ebé iha rai-laran, dalaruma aban bainrua povu bele mate hamlaha bainhira produtu hosi rai-li’ur la mai, entaun fila-fali ba produtu lokál hanesan ai-farina, hudi, talas, batar no selu-seluk tan.
Entertantu, tuir Ministériu Turizmu Komérsiu no Indústria (MTKI) liuhosi Diresaun Nasionál Regulasaun Komersiál no Protesaun Konsumidór (DNRPK) halo monitorizasaun ba folin mina-sona ne’ebé daudaun ne’e sa’e iha merkadu nasionál.
Antes ne’e, Diretora Nasionál Regulasaun Komersiál no Protesaun Konsumidór, Bertinette Viera Lobo Baptista, hateten atividade ne’e atu hatene loloos folin mina-sona sa’e iha merkadu nasionál.
“Hosi monitorizasaun ne’e hatudu katak folin mina-sona sa’e duni, tuir dadus ne’ebé ami rekolla, folin normál mina-sona litru 4,5 hosi distributór ho folin $6,93 iha fevereiru to’o marsu maibé agora $7,38. Nune’e, iha fevereiru retallu negosia mina-sona litru 4,5 hosi $7,25 to’o $7,75,” nia informa.
Distributór negosia mina-sona litru 2 ho folin $3,50 iha fevereiru no folin sai $4 iha marsu, nune’e presu loja no merkadu hosi $3,75 sa’e ba $4,25.
Tuir dadus ne’ebé MTKI rekolla, folin masin-midar mós sa’e uitoan iha merkadu, kilograma 50 ho folin $33,50 iha fevereiru no marsu no hosi retallu negosia $33,75 iha loja no merkadu.
Dadus sira-ne’ebé parte MTKI foti hosi loja distribuitór neen iha Dili hanesan Perisos, Lisun, Fortuna, Alfa Dili, Kreative Furak dan W4.
Tuir Bertinette Viera, folin sasán sa’e tanba nasaun exportadór la disponível hatama nesesidade bázika barak liután mai TimorLeste.
“Indonézia hanesan nasaun distributór seidauk disponível hatama ai-han no sasán seluk tan ho kuantidade barak mai Timor-Leste. Governu Indonézia sei foku ba demanda sira-nia merkadu,” nia dehan.
Daudaun ne’e, sei iha distributór rua iha rai-laran mak iha estoke mina-sona, ne’ebé presiza ona distribui ba retallu sira. Perisos iha mina-sona kontentór sanulu no Fortuna iha kontentór 23.
Tuir Dirijente ne’e, Distributór sira presiza hetan apoiu hosi Governu atu garante prosesu transportasaun sasán to’o tama Timor-Leste.
Notísia Relevante: TANE Konsumidór husu MPM regula folin kombustível
Jornalista : Nelson de Sousa
Editór : Cancio Ximenes
