DILI, EDUKASAUN, NASIONÁL

DSEMD Ezije MEJD hadi’a kualidade iha eskola públiku

DSEMD Ezije MEJD hadi’a kualidade iha eskola públiku

Estudante sira iha aula laran. Imajen Tatoli/Sérgio da Cruz

DILI, 03 maiu 2022 (TATOLI) – Diresaun Servisu Edukasaun Munisípiu Dili (DSEMD) ezije Ministériu Edukasaun Juventude no Desportu atu hadi’a  kualidade edukasaun iha eskola públiku  atu  la bele difikulta profesór no estudante sira iha futuru.

“Ha’u prontu asume kargu nu’udar Diretór Edukasaun iha Munisípiu Dili ne’e tanba hakarak halo mudansa ba edukasaun. Tanba ne’e ha’u ezije ba Ministériu Edukasaun tenke hadi’a ona kualidade edukasaun iha eskola públiku sira atu ajuda ita nia profesór sira,” Diretór Servisu Edukasaun Munisípiu Dili, Carlito da Silva hateten ba jornalista sira iha eskola EBC 30 de Agostu Komoro, tersa ne’e.

Nia preokupa ho kualidade eskola públiku. Tanba ne’e presija hadia. Tanba,  to’o agora eskola publiku la hadia ninia kualidade, maka inan aman barak mak hatama sira nia oan iha eskola privadu.

“Ha’u husu ba ita hotu atu servisu hamutuk ba sira ne’ebé maka hanorin iha eskola públiku esforsa an ba atu hasa’e kualidade iha eskola públiku sira,” tenik nia

Iha sorin seluk Ministru Edukasaun Juventude no Desportu (MEJD), Armindo Maia mós preokupa ho kondisaun no situasaun iha eskola Públiku sira.

Tanba ne’e ministru mós tau ona konsiderasaun no sei esforsu atu tinan ida ne’e ou tinan oin sei aselera liu tan formasaun no kapasitasaun ba profesór sira atu iha koñesimentu di’ak hodi bele dezenvolve edukasaun ho kualidade iha eskola públiku sira.

Jornalista: Tomé Amado

Editóra   : Armandina Moniz

 

iklan
iklan

Leave a Reply

iklan
error: Content is protected !!