VIQUEQUE, 13 maiu 2022 (TATOLI)—Daudaun ne’e empreza lokál ho inisiativa rasik normaliza ona ponte Beaço, diresaun Viqueque vila liga ba postu administrativu Uatulari no Uatucarbau, ne’ebé kotu durante tinan barak nian laran no difikulta movimentu transporte rodoviária no ema.
“Iha semana kotuk udan tun halo mota mós tun, halo tranporte sira labele ultrapasa ba ponte Beaço, ne’ebé difikulta transporte públiku sira-nia movimentu, maibé empreza lokál Caicasa ho inisiativa aluga eskavatór hodi aterru di’ak ona ponte Beaço,” Diretór Servisu Ministériu Obra Públika (MOP) munisípiu Viqueque, Mário do Rego, informa ba Agência Tatoli, iha Viquque, sesta ne’e.
Notísia relevante: Ponte Beaço kotu difikulta movimentu transpote públiku
Dirijente ne’e haktuir, empreza lokál ne’e aterru rai hodi fasilita transporte públiku sira bele ultrapasa liu ponte leten, nune’e bainhira tempu udan sira la presiza liu tan mota no mota tun boot karik la presiza hein.
Ba kestaun ne’e, jornalista Agência Tatoli tenta konfirma autoridade munisípiu no MOP Viqueque hodi fó solusaun ba ponte Beaço, maibé seidauk hetan resposta.
Jornalista : Vitorino Lopes da Costa
Editora : Julia Chatarina
