BAUCAU, HEADLINE, IMAJEN, MUNISÍPIU, POLÍTIKA

Sub-kaixa Nautetu entrega dokumentu rezisténsia ba AMRT

Sub-kaixa Nautetu entrega dokumentu rezisténsia ba AMRT

Sub kaixa Nautetu, lidera hosi Miguel Dias “Leki Sahe” entrega dokumentu rezisténsia ba Arkivu Muzeu no Rezisténsia Timorense. Imajen Tatoli/Jogerjo Guterres.

BAUCAU, 14 maiu 2022 (TATOLI) – Sub kaixa Nautetu, lidera hosi Miguel Dias “Leki Sahe” entrega dokumentu rezisténsia ba Arkivu Muzeu no Rezisténsia Timorense, Institutu Públiku (AMRT, I.P) iha Beco Planaltu, suku Tirilolo, Munisípiu Baucau, sábadu ne’e.

Dokumentu ne’e entrega hosi veteranu sira hanesan, Miguel Dias “Leki Sahe”, Salvador Mariz “Mate Moris”, Martinho Guterres Maris “Tiro” no Domingos Soares Fernandes “Uai-Ria”.

Diretór ezekutivu AMRT, IP, Hamar Antoninho Baptista Alves, hateten, prezensa AMRT nian la’ós atu rekolla dokumentu rezisténsia de’it maibé dokumenta mós veteran sira-nia viajen no kontribuisaun durante funu ba libertasaun nasionál.

Sub kaixa Nautetu, lidera hosi Miguel Dias “Leki Sahe” entrega dokumentu rezisténsia ba Arkivu Muzeu no Rezisténsia Timorense. Imajen Tatoli/Jogerjo Guterres.

Dokumentu ne’e purvolta 18 ne’ebé importante liu hanesan manuál temática da guerra, manuál polítika korrespondénsia no objetu balun hanesan HT (Handy Talky, falador à mão), fotografia no biografia husi saudozu komandante destakamentu ligasaun (deslig), saudozu Kaina.

Dokumentu hirak-ne’e importante tanba iha valór istóriku ne’ebé boot iha prosesu luta ba libertasaun nasionál.

“Dokumentu sira-ne’e mais válidu, ita prezerva tanba parte ida hanesan evidénsia ida bele loke jerasaun foun iha tempu tuir mai no koñese kona-bá luta defende ukun rasik-an,” Hamar hateten.

Veteranu Miguel Dias deside entrega dokumentu rezisténsia ne’e ho razaun atubele prezerva no sai arkivu atu nune’e jerasaun foun bele hatene liután istória luta naruk ida-ne’e.

“Ha’u-nią vida la’o daudaun ona, ne’e duni ha’u preokupa liu ba dokumentu hirak-ne’e, nune’e ha’u hakarak entrega hela ba AMRT, ha’u ho ha’u-nia grupu agradese ba AMRT atu prezerva dokumentu hirak-ne’e molok ha’u-nia destinu to’o,” Veteranu ne’e hateten.

Atividade rekolla dokumentu rezisténsia ne’e sei realiza mós iha suku Bucoli, postu administrativu Baucau Vila, suku Vemasse Tasi, postu administrativu Vemase, suku Bercoli, postu Venilale no ikus iha postu administrativu Baguia.

AMRT durante ne’e rekolla ona testemuña orál hamutuk na’in-800 resin, transkrisaun ona 400-resin, dokumentu fíziku rihun 50, dijitaliza ona rihun 30-resin, dijitaliza fotografia rihun 2-resin, klasifikasaun finál ba publikasaun online peskiza hamutuk rihun 16.

Jornalista       : Jogerjo Guterres

Editór             : Evaristo Soares Martins

iklan
iklan

Leave a Reply

iklan
error: Content is protected !!