iklan

HEADLINE, SEGURANSA

PNTL sei halo demisaun ba membru ne’ebé envolve arte marsiál

PNTL sei halo demisaun ba membru ne’ebé envolve arte marsiál

Reprezentante Grupu Arte-Marsiál PSHT halo atrasaun iha ámbitu serimónia reabertura ezersísiu arte-marsiál, iha Jináziu Dili, kinta (26/05). Imajen Tatoli/Francisco Sony

DILI, 14 juñu 2022 (TATOLI)— Komandante Operasaun Komandu PNTL Munisipiu Dili, Inspetór Xefe Delfin da Silva, hateten Komandu PNTL deside halo demisaun ba membru-sira ne’ebé envolve iha Grupu Arte Marsiál (GAM).

“Ha’u hanoin membru PNTL sira jura ona hodi serbí nasaun no povu ida ne’e, laiha tan organizasaun seluk atu serbí.  Kuandu sira maka viola hodi serbí fali organizasaun (GAM) ne’e tanke halo demisaun ba nia (membru ne’ebé envolve),” Komandante Operasaun Komandu PNTL Munisipiu Dili, Inspetór Xefe Delfin da Silva, hateten ba jornalista sira iha Komandu PNTL munisípiu Dili, tersa ne’e.

Notísia relevante:  KM Aprova Rezolusaun Reativa Arte-Marsiál

Komandante Operasaun Munisípiu Dili, hato’o asuntu ne’e bainhira halo sensibilizasaun kona-bá prosedimentu lima hosi segundu diretiva ba reativasaun atividade GAM iha territóriu nasionál.

Governu reativa ona atividade GAM, kompostu hosi Persaudara Setia Hati Terrate (PSHT), Kera-Sakti no KORKA, maibé proíbe membru PNTL envolve iha atividade ne’e.

“Kuandu membru PNTL ida maka envolve atividade arte marsiál mak sei detein hodi hasai nia átributu hodi submete ba prosesu investigasaun,” Komandante Operasaun Munisípiu Dili afirma.

Nune’e, Inspetór Xefe ne’e husu ba membru PNTL tenke kumpre nafatin lei no orden hodi serbí povu no nasaun ne’e ba dia’ak liu tan.

GAM tenke kumpre mata-dalan lima

Komandante Operasaun ne’e hateten PNTL Dili ho KRAM halo koordenasaun serbisu liuhosi sensibilizasaun diretiva segundu ba reativasaun arte marsiál sira atu kumpre mata-dala lima bainhira hala’o treinu.

“PNTL hanesan instituisaun ne’ebé iha haree liu ba lei no orden sira iha obrigasaun atu kolabora ho parte organizasaun arte masiál sira atu halo atividade iha komunidade bele asegura estabilidade pás no hakmatek,” nia afirma.

PNTL munisípiu Dili husu ba membru arte marsiál sira tenke kumpre regulamentu no prosedimentu sira ne’ebé  regula iha diretiva segundu  hosi rezolusaun Governu númeru  4/2020, membru GAM sira uza farda iha tempu treinu de’it, tanba bandu uza farda la’o pasiar iha Estrada.

“Diretiva ida ne’e mak membru GAM sira la kumpre PNTL sei halo deteinsaun liuliu hasai sira nia-farda,” nia afirma.

Nia hatutan: “Ami sei kontinua halo patrullamentu la’o aini ha tempu kalan hodi garante seguransa iha komunidade nia le’et. Tanba ne’e ami husu  ba grupu arte marsiál sira tenke obedese ba diretiva governu nia hodi labele halo perturbasaun iha tempu kalan bainhira halo atividade treinu”.

PNTL mós husu Grupu Arte Marsiál hotu tenke submete ba oras treinu nian hahú tuku 20:00 kalan too 22:00 tanba liu ida ne’e PNTL konsidera viola rezolusaun governu nian númeru 4/2022.

Iha biban hanesan, Prezidente Komisaun Reguladora Arte Marsiál (KRAM), Octavio Conceição, hateten, GAM tenke kumpre mata-dalan lima  hosi  segundu diretiva bazeia ba resoluzaun Governu  númeru 4/2020, loron 2 marsu, ne’ebé revoga tiha rezolusaun númuru 16/2013 ba re-ativasaun atividade arte marsiál.

Mata-dalan lima mak hanesan tuir prosedimentu ba lisensiamentu ka sensu ba membru organizasaun arte marsiál sira, prosedimentu ba re-estabelese ba sentru treinamentu organizasaun arte marsiál nian iha Dili, aplikasaun sansaun ba membru arte marsiál s, implementasaun konsellu disipliñar ba kada organizasaun arte marsiál rasik no prosedimentu sansaun aplikasaun admimistrativu ba arte marsiál.

“Husi matadan lima ne’e ita fó tempu ba sira GAM atu organiza sira nia-aan liuhosi sira nian organizasaun tanba la tuir mata-dalan lima ne’e no sira komete irregularidade no sei hetan sansaun,” nia afirma.

Nia hatutan “kada sentru treinamentu ida minimu tenke iha treinadór na’in-lima, kuandu liu ita sei xama atensaun, segundu ita fó koema hosi $50 too $2.000. Ita bele suspende sira nian atividade ou bele taka tiha sira nian atividade kuandu sira lakohi kolabora ho komandu PNTL no KRAM rasik,” Prezidente KRAM fó hanoin.

Mata dalan-lima ne’e mós regula treinadór ba organizasaun arte marsiál ida tenke kualifikadu ka hetan sertifikadu hosi nia organizaun rasik no tenke sertifika hosi KRAM no Federasaun Silat Timor-Leste (FESTIL).

Atu hetan sertifikadu, KRAM haree dahuluk mak treinadór ida tenke iha dominu ba espiritualidade, daruak trinadór tenke iha dominu ba edukasaun sivika no sidadania, datoluk trinadór ida tenke domina jinástika (seni bela diri) no kuartu treinadór fó treinu tenke transforma arte marsiál ne’e sai desportu ida.

Notísia relevante: Sub-KRAM husu  joven arte-marsiál konstribui ba pás no estabilidade

Jorrnalista: Natalino Costa

Editór      : Florencio Miranda Ximenes

iklan
iklan

2 Comments

  1. Apresia ho hanoin Komandante nian ne’e. Maibé, tuir ha’u-nia hanoin, se di’ak liután iha rekrutamentu ne’e kedas maka tem que halo kritériu ida rigorozu, ezemplu, ema ne’ebé envolve an ona iha GAM lalika admite nia tanba ita haree dala barak ona katak elementu polísia nian ne’ebé sai mós membru GAM nian la neutru ka imparsiál iha sira-nia atuasaun.
    Ida fali tan maka ha’u duvida ho kapasidade KRAM nian atu halo kontrolu.

Leave a Reply

iklan
error: Content is protected !!